काठमाडौँ । इंग्लिस प्रिमियर लिग फुटबल अन्तर्गत आर्सनलले लिभरपुललाई पराजित गर्यो ।
गएराति भएको खेलमा आर्सनलले लिभरपुललाई ३–१ गोलले हराएको हो । घरेलु मैदान इमिरेट्समा आर्सनललाई जित दिलाउन बुकायो साका, गाव्रियल मार्टिनेली र लियान्ड्रो ट्रोसार्डले एक–एक गोल गरे । लिभरपुलले एक गोल पनि आर्सनलको आत्मघाती गोलबाट पाएको थियो ।
खेलको १४ औं मिनेटमा साकाले गोल गर्दै आर्सनललाई सुरुवाती अग्रता दिलाए । पहिलो हाफको इन्जुरी समयमा आर्सनलका गाव्रियलले आत्मघाती गोल गर्न पुगेपछि लिभरपुल १–१ गोलको बराबरीमा आयो ।
यता, ६७ औं मिनेटमा लिभरपुलका गोलकिपर एलिसन बेकर र डिफेन्डर भ्यान डाइकबीच तालमेल नमिल्दा लिभरपुलले गोल खान पुग्यो । उनीहरुबीचबाट फुत्किएको बललाई सदुपयोग गर्दै मार्टिनेलीले गोल गरे ।
आर्सनल २–१ गोलले अघि बढ्यो । यस्तै इन्जुरी समयमा लियान्ड्रो ट्रोसार्डले गोल गर्दै आर्सनललाई ३–१ को जित दिलाए । ८८ औं मिनेटमा लिभरपुलका इब्राहिम कोनाटेले रातो कार्ड खान पुगे । उनले आर्सनलका काई हाभेटर््जलाई खराब ट्याकल गरेपछि रेफ्रिले दोस्रो पहेँलो र रातो कार्ड देखाए ।
जितसँगै आर्सनल अंकतालिकाको दोस्रो स्थानमा उक्लिएको छ । शीर्षस्थानको लिभरपुलको २३ खेलबाट ५१ अंक रहँदा आर्सनलको समान खेलबाट ४९ अंक छ । दुई खेल कम खेलेको म्यान सिटी ४६ अंकसहित तेस्रो स्थानमा छ ।
