लन्डन । इंग्लिस प्रिमियर लिगमा शनिबार भएको खेलमा ड्यानिएल अमार्टीले खेलको अन्त्यतिर गरेको गोलमा लेस्टरले ब्राइटनलाई २–१ ले हराएर अंक तालिकको दोस्रो स्थानमा उक्लेको छ ।
एक गोलले पछाडि रहेर खेलमा फर्कन सफल भएपछि लेस्टरको युरोपेली च्याम्पियन्स लिगमा छनोट हुने लक्ष्य पनि बलियो भएको छ । ब्राइटनले एडम ललानाको गोलले अग्रत लिएपछि केलेचीले बराबरी गोल फर्काएका थिए ।
यो जितपछि लेस्टरको २८ खेलबाट ५३ अंक भएको छ । जुन तेस्रो स्थानमा झरेको म्यानचेस्टर युनाइटेडमाथि दुई अंकको अग्रता हो । म्यानचेस्टरले एक खेल कम खेलेको छ ।
शनिबारकै अन्य खेलमा साउथह्याम्पटनले सेफिल्डलाई २–० ले हरायो भने एस्टन भिल्ला र उल्भ्सले गोलरहित बराबरी खेले । यसअघि बर्नली र आर्सनलले पनि १–१ को बराबरी खेलेका थिए ।
