काठमाडौं । प्रधानमन्त्री कप एकदिवसीय राष्ट्रिय प्रतियोगितामा त्रिभुवन आर्मी क्लबले कोशी प्रदेशलाई सजिलै हराएको छ । आर्मीको यो लगातार दोस्रो जित हो भने कोशीको लगातार चौथो हार हो ।
जितको लागि ८९ रनको झिनो लक्ष्य पछ्याएको आर्मीले ९.५ ओभरमा १ विकेट गुमाउँदै पूरा गर्यो । आर्मीको जितमा कुशल मल्ल २२ रनमा नट आउट रहे । ओपनर इमरान शेखले ३२ रन बनाए ।
बलिङतर्फ कोशीका सुजन थपलियाले एक विकेट लिए ।
त्यसअघि मुलपानी क्रिकेट मैदानमा टस हारेर ब्याटिङको निम्तो पाएको कोशी २४.४ ओभरमा अल आउट हुँदै ८८ रन बनाएको थियो । कोशीका कप्तान अंकित सुवेदीले सर्वाधिक ४१ रन बनाएका थिए । कोशीका १० खेलाडीले दोहोरो अंकमा रन बनाउन सकेनन् । पाँच खेलाडीले खाता नै नखोलि आउट भएका थिए ।
आर्मीका साहब आलमले उत्कृष्ट ६ विकेट लिए । उनले ६.४ ओभरमा ३ मेडनसहित १४ रन खर्चेर ६ विकेट लिए । कुशल मल्लले २ विकेट लिँदा सोमपाल कामी र विवेक यादवले १–१ विकेट लिए ।
