काठमाडौँ । नेकपा (एकीकृत समाजवादी) का बरिष्ठ नेता तथा पूर्वप्रधानमन्त्री झलनाथ खनालले पार्टी उपाध्यक्ष राजेन्द्र पाण्डेलाई कृषि मन्त्री बनाउन सिफारिस गर्नुभएको छ ।
प्रधानमन्त्री पुष्पकमल दाहाल प्रचण्डलाई उहाँले पटक पटक भेट गरी आफ्नो कोटाबाट पाण्डेलाई कृषिमन्त्री बनाउन सिफारिस गर्नुभएको स्रोतले बतायो ।
स्रोतले भन्यो, “झलनाथ खनालले हिजो र आज गरी दुई दिन प्रधानमन्त्री ज्यूलाई भेट गरी राजेन्द्र पाण्डेलाई कृषिमन्त्री बनाउन सिफारिस दिनु भएको छ, तर उक्त विषयमा प्रधानमन्त्री ज्यूले केही भन्नु भएको छैन् ।”
नेकपा (एकीकृत समाजवादी) बाट भौतीक योजना तथा यातायातमन्त्री बनेका प्रकाश ज्वालालाई फिर्ता बोलाउन प्रधानमन्त्रीले सो पार्टीका अध्यक्ष माधवकुमार नेपालसँग सल्लाह गरेसँगै नेता खनाल आफ्नो कोटाबाट पाण्डेलाई कृषिमन्त्री बनाउन लागि परेको स्रोतको दाबी छ ।
तर प्रधानमन्त्री प्रचन्डले भने मन्त्रीका लागि पार्टी अध्यक्षबाटै सिफारिस भएर आउनुपर्ने, अरु नेताले व्यक्तिगत रूपमा सिफारिस गरेर नहुने जवाफ झलनाथलाई दिएको पनि स्रोतले बताएको छ ।
तर माधवकुमार नेपालले भने अहिले सम्म कसैको नाम सिफारिस नगरेको स्रोतको भनाई छ ।
गएको शुक्रबार ललितपुरको बालकुमारीमा भएको घटनामा मन्त्री प्रकाश ज्वालाको सवारी नै कारक बनेको निष्कर्ष सबैतिरबाट आउँदै गर्दा प्रधानमन्त्री प्रचण्ड मन्त्री ज्वालालाई फिर्ता बोलाउने तयारीमा रहेको देखिएका छन् ।
प्रधानमन्त्री प्रचण्डले हिजो बालुवाटारमा यस विषयमा नेपाली कांग्रेसका सभापति शेरबहादुर देउवासँग पनि परामर्श गरेका स्रोतको दाबी छ ।
देउवाले प्रधानमन्त्रीको सोचमा खासै विरोध नजनाएको बताइएको छ । तर कांग्रेसका मन्त्री फेर्ने बारेमा भने देउवा सकारात्मक छैनन् ।
सो घटनाले सरकारमाथि निकै ठूलो आक्रोस थपिएको र देशभरका युवाले आन्दोलनको तयारी समेत गरेको थाहा भएकाले मन्त्री नै बर्खास्त गर्ने मुडमा प्रधानमन्त्री देखिएका बालुवाटार स्रोतले दाबी गरेको छ ।
