काठमाडौँ। प्रधानमन्त्री पुष्पकमल दाहाल प्रचण्ड वर्तमान मन्त्रीमण्डलमा मन्त्रीहरु फेरबदल गर्ने पक्षमा छन् । उनले सरकारको एक वर्ष पुगेका अवसरमा गत पुस १० गते गरेको सम्बोधनमा नै नयाँ कार्यशैली, नयाँ टिम भनेर घोषणा गरेका थिए ।
उनी आगामी महिना हुन लागेको राष्ट्रिय सभाको निर्वाचन अगावै मन्त्री फेर्ने मुडमा छन् । त्यसैले उनले हिजो नै नेकपा एसका नेता माधव नेपाललाई फोन नै गरेर मन्त्री प्रकाश ज्वालालाई फिर्ता लैजान भनेका थिए । तर प्रधानमन्त्रीको यो मुडको बाधक भने कांग्रेस सभापति शेरबहादुर देउवा भएका छन् । देउवाले आफूले पठाएका मन्त्री दुइ वर्षकै लागि भएकाले अहिले मन्त्री फेर्न नहुने जनाएका थिए । देउवाको यो प्रतिक्रियापछि प्रधानमन्त्रीलाई अप्ठेरो परेको बुझिएको छ ।
हिजो राष्ट्रिय सभाको निर्वाचनका विषयमा छलफल गर्न भनी बसेको बैठकमा पनि प्रधानमन्त्री प्रचण्डले देउवासँग पार्टीका तर्फबाट मन्त्रीमण्डलमा नयाँ नाम दिन आग्रह गरेका थिए । उनले विशेषगरी अर्थमन्त्री प्रकाशशरण महतलाई फिर्ता लैजान देउवासँग आग्रह गरेका थिए । तर देउवाले भने अहिलेलाई मन्त्री नफेर्ने भनेर टारेका थिए । तर अर्काे एक समाचार स्रोतले भने अर्थमन्त्री फेरे गृहमन्त्री पनि फेर्नुपर्ने अडानमा देउवा देखिएका छन् ।
देउवाले अर्थमन्त्री फेरेमा गृह पनि फेर्नुपर्ने र गृहमा कांग्रेसले मान्छे पठाउने बताएका थिए । प्रधानमन्त्री भने अर्थमन्त्री महतको कार्यशैलीप्रति असन्तुष्ट देखिएका छन् । समाचार स्रोतका अनुसार मन्त्री फेर्ने काम अहिलेलाई अर्थात् माघको दोस्रो सातासम्मका लागि रोकिएको छ । तर भौतिक योजना तथा यातायात मन्त्री प्रकाश ज्वालालाई भने तत्कालै फेर्ने मुडमा प्रधानमन्त्री रहेका छन् ।