काठमाडौं । बालकुमारी घटनाबारे छानबिन गर्न सरकारले उच्चस्तरीय छानबिन आयोग गठन गर्ने भएको छ ।
आइतबार बालुवाटारमा बसेको सत्ता गठबन्धनको बैठकले दुईजना युवाको मृत्यु हुने गरी भएको घटनालगायतका विषयमा छानबिन गर्न उच्चस्तरीय जाँचबुझ आयोग गठन गर्ने सहमति भएको हो ।
घटनाको छानबिनको लागि प्रधानमन्त्री पुष्पकमल दाहाल प्रचण्डले उपप्रधान तथा गृहमन्त्री नारायणकाजी श्रेष्ठलाई जाँचबुझ आयोग ऐन, २०२६ को दफा ३ को उपदफा (२) बमोजिम पूर्व न्यायाधीशको अध्यक्षतामा उच्चस्तरीय जाँचबुझ आयोग गठन गर्ने गर्नेसम्बन्धी प्रस्ताव ल्याउन निर्देशन दिएका छन् ।
यसअघि गृहमन्त्रालयले नेपाल प्रहरीका डीआईजीपीको नेतृत्वमा तीन सदस्यीय छानबिन समिति गठन गरेको थियो । तर उक्त छानबिन समितिप्रति मृतकका परिवारले असन्तुष्टि जनाउँदै शव नबुझ्ने अडान राख्दै आएका छन् ।
बालकुमारी घटनामा अछामका वीरेन्द्र शाह र दैलेखका सुजन रावतको मृत्यु भएको थियो भने भौतिक मन्त्री प्रकाश ज्वालाको गाडी आगजनी भएको थियो ।
