ललितपुर । ललितपुरको बालकुमारी क्षेत्रमा भएको झडपमा दुई युवाको मृत्यु भएको घटनाप्रति राष्ट्रिय मानव अधिकार आयोगको गम्भीर ध्यानाकर्षण भएको जनाएको छ ।
शुक्रबार रोजगार अनुमति प्रणाली (इपिएस) परीक्षामा आवेदन दिन पाउनुपर्ने माग गर्दै युवाहरुले गरेको आन्दोलनको क्रममा प्रहरीले गोली चलाउँदा दुई जनाको मृत्यु भएको थियो ।
आयोगका प्रवक्ता टीकाराम पोखरेलले विज्ञप्ति जारी गर्दै भनका छन् ‘ईपीएस परीक्षाका सबैतर्फको छनौट प्रक्रियामा सहभागी हुन पाउनुपर्ने माग राखी प्रदर्शनमा उत्रिएका युवाहरुमाथि प्रहरीले बल प्रयोग गर्दा प्रहरी र प्रदर्शनकारीहरु बिच झडप भएको, झडपमा परी गम्भीर घाइते भएकामध्ये दुई जनाको उपचारको क्रममा मृत्यु भएको, अन्य थप केही घाइते भएका र केही प्रदर्शनकारीलाई प्रहरीले नियन्त्रणमा लिएको पाइएको छ’ ।
प्रदर्शनकै क्रममा आन्दोलनकारीले भौतिक पूर्वाधार तथा यातायात मन्त्री प्रकाश ज्वालाको सवारी साधन आगजनी गरेका थिए । आगजनीमा गाडीमा सवार सबैजना सकुशल रहेको भए पनि गाडी तथा गाडीमा रहेका कागजातहरू जलेर पूर्ण रूपमा नष्ट भएको आयोगले जनाएको छ ।
यस बारे अनुगमन गर्न आयोगको टोली आजै घटनास्थलतर्फ गइसकेको प्रवक्ता पोखरेलले जानकारी दिए ।
