काठमाडौं । सभामुख अग्नि सापकोटाले संसदमा रहेका अध्यादेश अगाडि बढाउन संसद तयार रहेको बताउनु भएको छ । सरकारले ल्याएका कुरा अड्काउनुपर्छ भन्ने मानसकितामा आफू नरहेको पनि स्पष्ट पार्नुभएको छ । उहाँले भन्नुभयो, ‘सरकारले ल्याएका कुरा अड्काउनु पर्छ भन्ने मलाई लागेको छैन, अड्काउने मनसाय पनि छैन, निष्पक्ष र तटस्थताका साथ अगाडि बढ्छु।'
सभामुख सापकोटाले संसदको कामकारबाहीलाई अगाडि बढाउने विषयमा प्रधानमन्त्रीसँग भेट्न आफूले समय मागेको बताउनु भएको छ । संसदीय मामिला सम्बन्धी पत्रकारहरूसँग सिंहदरबारमा भएको भेटमा उहाँले भन्नुभयो ‘कानूनमन्त्रीमार्फत कुरा भइरहेको थियो, आज राष्ट्रपतिज्यूलाई बिदाइ गर्ने क्रममा एयरपोर्टमा पनि प्रधानमन्त्रीसँग कुराकानी भयो,’ ‘समय मागेको छु, खबर आउला ।’
प्रतिनिधिसभा पुनःस्थापनायता प्रधानमन्त्री र सभामुखबीच भेटवार्ता भएको छैन । संसद नियमित गर्नेतर्फ सभामुखको भूमिका सकारात्मक नभएको प्रधानमन्त्री केपी शर्मा ओलीले सार्वजनिक मञ्चबाटै टिप्पणी गर्नुभएको छ ।
