काठमाडौं । नेपाली राष्ट्रिय क्रिकेट टीमका स्पिनर सन्दीप लामिछानेविरुद्धको मुद्दामा आज ‘हेर्दाहेर्दै’मा परेको छ ।
न्यायाधीश शिशिरराज ढकालको इजलासमा परेको मुद्दा बहसपश्चात हेर्दाहेर्दैमा राखिएको हो ।
विभिन्न बाहानामा पछाडि धकेलिदै आएको सन्दीपको मुद्दाको फैसला बहस आजबाट सुरु भएको हो । आज न्यायाधीश ढकालले जाहेरीकर्ताको तर्फबाट चार जना वकिलसँग बहस गरेका थिए । अब यसले निरन्तरता पाउने छ ।
यससँगै, न्यायाधीश ढकालको ईजलासमा नै मुद्दाको फैसला गर्ने निश्चित भएको छ । सोमबार र मंगलबार सार्वजनिक बिदा भएकाले बुधबार मुद्दाको सुनुवाइ हुनेछ ।
गत फागुन १५ मा न्यायाधीश सपना प्रधान मल्ल र कुमार चुडालको संयुक्त इजलासले लामिछानेको मागबमोजिम विदेश जान अनुमति दिँदै मुद्दामा जिल्ला अदालतलाई फास्ट ट्रयाक तथा कन्टिनियस हेयरिङका प्रक्रिया अवलम्बन गरी छिटो कारबाही किनारा गर्नू भनी आदेश दिएको थियो ।
