एजेन्सी । साउथ सुपरस्टार प्रभासको फिल्म ‘सालार’ ले रिलिजको दोस्रो दिन पनि बक्स अफिसमा आफ्नो आकर्षण कायम राखेको छ । ओपनिङ डेमा सालारले भारतीय बक्स अफिसमा ९० करोड ७० लाख रुपैयाँ कलेक्सन गरेको थियो ।
दोस्रो दिन देशभर ५५ करोड रुपैयाँ कमाएको छ । अहिले यसको कुल भारतीय बक्स अफिस कलेक्शन १४५ करोड ७० लाख पुगेको छ ।
व्यापार विज्ञहरूका अनुसार ओपनिङ डे मा फिल्मले विश्वभर १७८.७ करोड कलेक्सन गरेको थियो भने दोस्रो दिन १०६ करोड कलेक्सन गरेको छ । मात्र दुई दिनमा ‘सालार’को कुल ग्लोबल कलेक्सन रु २८५ करोड पुगेको छ ।
अर्कोतर्फ शाहरुख खानको फिल्म ‘डंन्की’को भारतीय बक्स अफिस कलेक्सनको कुरा गर्ने हो भने तेस्रो दिन अर्थात शनिबार २५ करोड ५० लाख रुपैयाँ कलेक्सन गरेको छ । शनिबार फिल्मको हिन्दी संस्करणको अकुपेन्सी ४०.७१ प्रतिशत थियो । दोस्रो दिनको गिरावटपछि तेस्रो दिन यो फिल्मको कमाईमा उछाल आएको छ ।
करिब ३५०–४०० करोड रुपैयाँमा बनेको सालारले द्रुत गतिमा कमाइ गरिरहेको छ । यसलाई हेर्दा फिल्मले विकेन्डमा बजेटभन्दा बढी कमाउने अनुमान गर्न सकिन्छ । प्रशान्त नील निर्देशित फिल्म सालारमा प्रभाससँगै पृथ्वीराज सुकुमारन, श्रुति हसन र टिनु आनन्द पनि महत्वपूर्ण भूमिकामा छन् ।
