काठमाडौैँ : पूर्वराष्ट्रपति विद्यादेवी भण्डारीले कलाकार मेनुका पौडेलको गायन यात्राको सफलताको लागि हार्दिक शुभकामना व्यक्त गर्नुभएको छ ।
सामाजिक संञ्जाल मार्फत पूर्वराष्ट्रपति भण्डारीले जन्मजात दृष्टिविहीन रहनुभएकी मेनुका पौडेलको सङ्गीतप्रतिको यो लगाव, यसका लागि उहाँले गर्नुभएको कठीन संघर्ष र उहाँले हासिल गर्नुभएको यो सफलताले नेपाली किशोर–किशोरी एवं युवा युवतीलाई आफ्नो रूचिको क्षेत्रमा गम्भिरतापूर्वक लागि पर्न प्रेरणा प्रदान गर्ने उल्लेख गर्नुभएको छ ।
भारतीय टेलिभिजन गायन प्रतियोगिता-इण्डियन आइडल, सिजन १४ को प्रतिस्पर्धीको रूपमा झापा हल्दिबारीकी युवा गायिका मेनुका पौडेलले आफ्नो उत्कृष्ट गायनकलाको माध्यमबाट सबैको मन जित्न सफल हुनुभएको छ ।
उहाँले मेनुकाको गायकीबाट प्रतियोगिताका मूल्याङ्कनकर्ता लगायत अतिथिका रूपमा आउने भारतीय सङ्गीत एवं चलचित्र क्षेत्रका ठूला ठूला हस्तीहरूसमेत मन्त्रमुग्ध हुनेगरेको कुरा उक्त कार्यक्रम हेर्ने सबैलाई विदितै रहेको जनाउनु भएको छ ।
