काठमाडौं । रत्नपार्क–सूर्य विनायक द्रुत बस सेवा आजदेखि पुन: सञ्चालनमा आएको छ । संविधान दिवसका दिनबाट सुरु भएको द्रुत सेवा दसैँ र तिहारको बिदामा यात्रुको चाप न्यून भएपछि केही समयका लागि रोकिएको थियो ।
यातायात व्यवस्था विभागका महानिर्देशक उद्धवप्रसाद रिजालले आजबाट द्रुत बस सेवा पुन: सुरु भएको जानकारी दिए । थप ११ वटासहित पहिलेभन्दा व्यवस्थित तरिकाले द्रुत बस सेवा पुन: सञ्चालनमा ल्याइएको उनले बताए । उनले भने, ‘११ वटा बस थपेर पुन: द्रुत बस सेवा सुरु भएको छ । अहिले २९ वटा बसेले सेवा दिइरहेको छ । यही हप्ताभित्र बसको सख्याा ३६ पुर्याउने छौँ ।’
भक्तपुरको सूर्यविनायकबाट रत्नपार्कसम्मको सडक खण्डमा चल्ने द्रुत बस सेवाले यात्रुलाई ४५ मिनेटमै सूर्यविनायकबाट रत्नपार्क पुर्याउनेछ । सामान्य बसलाई भने १ घण्टाभन्दा धेरै लाग्ने गरेको छ ।
द्रुत बसलाई जाम छल्न सजिलो हुने गरी माइतीघर, कोटेश्वर, जडीबुटीमा ननस्टप सञ्चालनमा ट्राफिक प्रहरीले सहयोग गर्नेछन् । यसका लागि विभागले सूर्यविनायकबाट सल्लाघारी, राधेराधे, थिमिचोक, चारदोबाटो, गठ्ठाघर, कौशल्टार, लोकन्थली, जडीबुटी, कोटेश्वर, तीनकुने, शान्तिनगर, नयाँबानेश्वर, बबरमहल, माइतीघर, भद्रकाली र अन्तिम रत्नपार्कमा बस बिसौनी तोकिएको छ ।
सडकमा रातो रङगले पोतिएको लेनमा मात्र यी बस सञ्चालन हुन पाउनेछन् । त्यो लेनमा यस अवधिमा द्रत बस र आपतकालीन सेवाका सवारी साधनबाहेक अरु कुनै सवारी साधन चल्न पाउने छैनन् । सूर्यविनायकबाट बिहान ८ देखि ११ बजेसम्म र अपरान्ह ४ देखि ६ बजेसम्म सञ्चालन हुने द्रुत सेवाका बस दुवैतर्फबाट पाँचरपाँच मिनेटको फरकमा छुट्नेछन् ।
