काठमाडौँ ।नेकपा एमालेको भ्रातृ संगठन राष्ट्रिय युवा संघ नेपाल र ‘राष्ट्र, राष्ट्रियता, धर्म, संस्कृति र नागरिक बचाऊ महाअभियानले आज काठमाडौँमा छुट्टाछुट्टै प्रदर्शन गर्दैछन् ।
युवा संघले काठमाडौँको तीन कुने र व्यवासायी दुर्गा प्रसाईं संयोजकत्व मा रहेको महाअभियानले बल्खुमा कार्यक्रम गर्दैछन् ।
युवा संघले भक्तपुरको सल्लाघारीबाट जुलुस निकाली कोटेश्वर–च्यासलस्थित पार्टी कार्यालय हुँदै बिहान ११ बजे तीनकुनेमा सभा गर्ने तयारी गरेको छ ।
प्रसाईँको महाअभियान सानोठिमीस्थित एसओएसबाट पेप्सीकोला–मित्रपार्क–चावहिल हुँदै दिउँसो १ बजे बल्खु पुग्नेछ ।
यसैगरी उपत्यकाका बिभिन्न स्थानबाट निस्कने जुलुस बल्खु पुग्ने मार्ग अभियानले तय गरेको छ ।
एकैदिन दुई समूहले प्रदर्शन गर्ने भएपछि उपत्यकाको सुरक्षा व्यवस्था कडा पारिएको छ । काठमाडौं प्रहरी प्रमुख, प्रहरी वरिष्ठ उपरीक्षक (एसएसपी) भूपेन्द्र खत्रीले काठमाडौंका ९० भन्दा बढी ठाउँमा मोबाइल टोली, तयारी अवस्थामा रहनेहुदा सुरक्षा प्रवन्ध गरिसकेको र प्रभावकारी रुपमा सुरक्षा व्यवस्थालाई अघि बढाइएको बताउनु भयो ।
