काठमाडौं । राष्ट्रिय स्वतन्त्र पार्टीका अध्यक्ष रवि लामिछानेले टिकटक बन्द बारे प्रधानमन्त्रीले भ्रमपूर्ण अभिव्यक्ति दिएको जनाउनु भएको छ ।
मंगलवार भक्तपुरमा नेपाल संवत ११४४ र नेपाल संवतका प्रवर्तक राष्ट्रिय विभूति शंखधर साख्वाको प्रतिमामा माल्यार्पण कार्यक्रमलाई सम्बोधन गर्दै प्रधानमन्त्रीले सत्तापक्ष र प्रतिपक्ष एक ठाउँमा उभिएर निर्णय गरेको बताउनु भएको थियो।
प्रधानमन्त्रीको अभिव्यक्ति भ्रमपूर्ण भएको भन्दै लामिछानेले त्यसको प्रतिवाद गर्नुभएको छ ।
उहाँले सामाजिक संञ्जालमा लेख्नु भएको छ-
प्रधानमन्त्री ज्यु ले मेरै अगाडि आज एक कार्यक्रममा गलत तथा भ्रमपुर्ण अभिव्यक्ति दिनु भयो। टिकटक बन्द गर्ने सन्दर्भमा सत्ता पक्षीय र विपक्षी सबै दलको सहमति र छलफल पछि निर्णयमा पुगेको बताउनु भयो।
म लगायत रास्वपा का कुनै नेता सँग यस विषयमा कुनै औपचारिक अनौपचारिक छलफल वा सहमति भएको छैन। छदै छैन। प्रधानमन्त्री ज्युले यो गलत अभिव्यक्ति सच्याउनु हुने छ र कुन कुन दलले सहमति जनाएका हुन् भन्ने स्पष्ट पारिदिनु हुनेछ भन्ने विश्वास लिएको छु।
सोमबार बसेको मन्त्रीपरिषद्को बैठकले टिकटक बन्द गर्ने निर्णय गरेको थियो ।
तस्बिर- रमेश गिरी:रासस
