इङलिस प्रिमियर लिग अन्तर्गत शनिबार राति भएका खेलमा आर्सनल र म्यान्चेस्टर युनाइटेड विजयी भएका छन् ।
आर्सनलले गृह मैदान इमिरेट्स स्टेडियममा पाहुना टोली बर्नलीलाई ३–१ गोल अन्तरले पराजित गरेको थियो । आर्सनलका लागि लियान्ड्रो ट्रोसार्ड (४६), विलियम सालिभा (५७) र ओलेक्सान्ड्रो जिन्चेन्को (७४) ले गोल गरेका थिए ।
बर्नलीका लागि एकमात्र गोल जस ब्राउनहिलले ५४औं मिनेटमा गरेका थिए ।
यो जितसँगै आर्सनल १२ खेलबाट २७ अंक बनाएर लिगमा दोस्रो स्थानमा उक्लेको छ । उल्भ्ससँग पराजित भएको टोटेनह्याम भने तेस्रो स्थानमा झरेको छ । पहिलो स्थानमा भने समान २७ अंक रहेको म्यान्चेस्टर सिटी छ ।
उता, हिजै राति भएको अर्को खेलमा म्यान्चेस्टर युनाइटेडले यसै सिजनमा प्रिमियर लिगमा भित्रिएको लुटोनलाई संघर्षपूर्ण खेलमा १–० गोलले पराजित गरेको थियो ।
निकै आक्रामक खेल प्रस्तुत गरे पनि युनाइटेडका लागि एकमात्र गोल लिन्डेलोफले गरेका थिए । यो जितसँगै युनाइटेड १२ खेलबाट २१ अंकका साथ लिगको छैटौं स्थानमा छ ।
अन्य खेलमा बर्नमाउथले न्यूक्यासल युनाइटेडलाई २–० गोल अन्तरले पराजित गरेको थियो भने एभर्टनले क्रिस्टल प्यालेसलाई ३–२ गोल अन्तरले हराएको थियो ।
