काठमाडौं । प्रमुख प्रतिपक्षी दल नेकपा एमालेका उपाध्यक्ष विष्णु पौडेलले सदनको यो अधिवेशन निराशाजनक रहेको टिप्पणी गरेका छन् । बिहिबार प्रतिनिधिसभाको बैठकमा बोल्दै उनले सरकारले सदन प्रभावकारी बन्न नदिएको आरोप लगाए।
सदनको काम प्रभावकारी नहुनुमा सरकारको दृष्टिकोण र गतिविधिहरू जिम्मेवार रहेको ठहराउँदै उनले भने, ‘सदन किन र कसका कारणले प्रभावकारी हुन सकेन ? चर्चा हुन्छ सांसद्, सभाको कारणले प्रभावकारी हुन सकेन । तर, तथ्यले त्यस्तो भन्दैन । सदनको काम प्रभावकारी हुन नसक्नुको मुख्य जिम्मेवारी सरकार नै हो । सरकारको दृष्टिकोण र सरकारका गतिविधिहरू जिम्मेवार छन् ।’
उपाध्यक्ष पौडेलले सरकारले अपराधी र तस्करीलाई दण्डित गराउनको लागि कुनै कदम नचालेको आरोप लगाए । एमालेले सदन अवरोध नगरेको भए सुन तस्करीको छानबिन गर्न आयोग नबन्ने बताउदै उनले भने,’सरकारले तस्करीलाई कारबाही गर्नको लागि प्रतिपक्षले उठाएको जायज मागलाई लामो समयसम्म सुनेन । हामीले सदन अवरोध नगरेको भए सुन तस्करीको विषयमा जुन जाँच आयोग बन्यो त्यो बन्दैनथ्यो । अहिले पनि भेपमा भएको तस्करीबारे भएको साढे ९ किलो भनिएको त्यो सुन कहाँ छ ? यसरी तस्करी भएको सुनलाई समेत राज्यकोषमा दाखिल गर्न नसक्ने अवस्थामा सरकार छ ।’
