आइसिसी विश्वकप क्रिकेट अन्तर्गत मंगलबार भएको खेलमा पाकिस्तानसँग पराजित भएसँगै विश्वकपको सेमिफाइनल प्रवेश गर्ने बंगलादेशको आशा समाप्त भएको छ, र विश्वकपबाट बाहिरिने पहिलो टिम बनेको छ ।
कोलकाताको इडेन गार्डेनमा भएको खेलमा पाकिस्तानले बंगलादेशलाई ७ विकेटले पराजित गरेको थियो । यो जितसँगै पाकिस्तानले सात खेलबाट ६ अंक हासिल गरेको छ, र टप फोरमा प्रवेश गर्ने सम्भावना जीवितै राखेको छ ।
टस जितेर बंगलादेशले पहिले ब्याटिङ गर्ने निर्णय गरेको थियो । तर पाकिस्तानी धारिलो बलिङसामु बंगलादेश निरिह भएको थियो । बंगलादेशले ४५.१ ओभर खेल्दै सबै विकेट गुमाएर २०४ रन मात्र बनाएको थियो ।
बंगलादेशका लागि लिटोन दासले ४५, महमुदुल्लाहले ५६, कप्तान शकिब अल हसनले ४३, हसन मिराजले २५ रन बनाएका थिए । अन्य ब्याट्सम्यान सबै सस्तैमा पवेलियन फर्केका थिए ।
पाकिस्तानी बलरहरु शहिन शाह अफ्रिदी र मोहम्मद वसिमले समान तीन तीन विकेट लिएका थिए भने ह्यारिस राउफले २, इफ्तिखर अहमद र उसमा मिरले समान एक एक विकेट लिएका थिए ।
२०५ रनको लक्ष्य पछ्याएको पाकिस्तानले ३२.३ ओभरमा तीन विकेट गुमाएर खेल जितेको थियो । पाकिस्तानका लागि ओपनरहरु अब्दुल्लाह शफिकले ६८ र फखर जमानले ८१ रनको पारि खेलेका थिए ।
कप्तान बाबर आजम ९ रन बनाएर क्याचआउट भएका थिए । मोहम्मद रिजवानले २६ र इफ्तिखर अहमदले १७ रन बनाए, उनीहरु दुबै अविजित रहे ।
उत्कृष्ट छ टिम
१. भारत – १२ अंक (६ खेल)
२. दक्षिण अफ्रिका – १० अंक (६ खेल)
३. न्युजील्यान्ड – ८ अंक (६ खेल)
४. अस्ट्रेलिया – ८ अंक (६ खेल)
५. पाकिस्तान – ६ अंक (७ खेल)
६. अफगानिस्तान – ६ अंक (६ खेल)
