अमेरिकी प्रतिनिधिसभाको सभामुखमा रिपब्लीकन पार्टीका माइक जोन्सन निर्वाचित भएका छन् । तीन हप्ता अघि सभामुख केभिन म्याकार्थीलाई रिपब्लीकन पार्टीकै सांसदहरुको विद्रोहपछि सभामुख पदबाट हटाएसँगै नयाँ सभामुख को बन्ने भन्नेमा अन्यौल देखिएको थियो ।
गाजा द्वन्द्व, युक्रेन युद्ध र दक्षिणी सीमामा पर्खाल निर्माणजस्ता महत्वपूर्ण मुद्दाका लागि १०० अर्ब डलरभन्दा बढीको सहायता अनुमोदन गर्न सभामुखको अभावमा हाउसको बैठक समेत बस्न सकेको छैन ।
अमेरिकी तल्लो संसदमा रिपब्लीकन पार्टीको झिनो बहुमत छ । हाउसमा रिपब्लीकनको २२१ मत छ भने डेमोक्रेटिक पार्टीको २१२ छ । अमेरिकी संसदमा सभामुख चयनका लागि २१७ मतको आवश्यक पर्दछ ।
तर मतदानमा जोन्सनले २२० मत पाएका थिए भने विपक्षमा २०९ मत परेको थियो ।
जोन्सनमाथि सन् २०२० को राष्ट्रपतीय निर्वाचनको मतपरिणाम स्वीकारयोग्य नभएको भन्दै कानुनी लडाइँको नेतृत्व गरेको आरोप लाग्दै आएको छ जुन चुनावमा डोनाल्ड ट्रम्प वर्तमान राष्ट्रपति जो बाइडेनसँग पराजित भएका थिए ।
अमेरिकी पूर्व सभामुख म्याकार्थीले डेमोक्रेटिक पार्टीका राष्ट्रपति जो बाइडेनका योजनालाई सहयोग र समर्थन गरेको आरोप लगाउँदै ट्रम्प निकट सांसदहरुले विद्रोह गरेका थिए ।
अर्को वर्ष हुने अमेरिकी राष्ट्रपति निर्वाचनमा बाइडेनलाई संसदबाट असहयोग गरी असफल तुल्याउन रिपब्लीकन लागिपरेका छन् । अर्को चुनावमा डेमोक्रेटिक पार्टीका तर्फबाट बाइडेन उम्मेदवार हुने घोषणा भइसकेको छ भने रिपब्लीकन तर्फबाट डोनाल्ड ट्रम्पको सम्भावना बढी छ । एजेन्सी
