एजेन्सी । नेदरल्यान्ड्सका कप्तान स्कट एडवर्ड्सले दक्षिण अफ्रिकामाथिको ऐतिहासिक जितमा कुनै कमी नभएको र आफ्नो टोलीले उत्कृष्ट प्रदर्शन गरे विश्वकपमा कुनै पनि टोलीलाई हराउन सक्ने बताएका छन् ।
अर्कोतर्फ, दक्षिण अफ्रिकाका प्रशिक्षक रोब वाल्टरले डेथ ओभरमा कमजोर बलिङ र ब्याटिङमा कमजोर सुरुवातलाई हारको दोष दिएका छन् ।
खेलपछि पत्रकार सम्मेलनमा एडवर्ड्सले भने, ‘हामी प्रत्येक खेलमा रणनीतिका साथ प्रवेश गर्छौं र जितका लागि सक्दो प्रयास गर्छौं । हामी हाम्रो उत्कृष्ट क्रिकेट खेल्न चाहन्छौं र त्यसो गरेर हामी कुनै पनि टोलीलाई हराउन सक्छौं ।
उनले थप भने, ‘छनोटपछि के गर्ने भन्ने निर्णय गरेका थियौँ । हामी यहाँ विश्वकपको मजा लिन आएका होइनौँ । हामी यहाँ जित्नका लागि छौं ।
मंगलबार भएको खेलमा नेदरल्याण्ड्सले दक्षिण अफ्रिकालाई ३८ रनले पराजित गरेको थियो । विश्वकप इतिहासमा टेस्ट खेल्ने राष्ट्रविरुद्ध डच टोलीको यो पहिलो जित हो । वर्षाका कारण यो खेल ४३ ओभरको भएको थियो ।
