काठमाडौँ । अभिनेता राजेश हमालबारे आफूले दिएको अभिव्यक्ति विवादित बनेपछि नायिका उषा रजकले माफी मागेकी छन् ।
शनिबार एक टेलिभिजनमा प्रसारित कार्यक्रममा रजकले राजेश हमाललाई ‘ओभर रेटेड’ कलाकारको संज्ञा दिएकी थिइन् । उनले हमालको अभियन र नृत्य कौशलमा प्रश्न उठाउँदै यस्तो अभिव्यक्ति दिएकी थिइन् ।
कार्यक्रमको टिजर सार्वजनिक भएपछि नै रजकको अभिव्यक्तिबारे व्यापक टिप्पणी भइरहेको थियो । कार्यक्रम प्रसारण भएपछि भने उनीबारे तीव्र आलोचना भयो र माफी नै माग्न बाध्य भइन् ।
“हाम्रा वरिष्ठ अभिनेता राजेश हमालजीसँग माफी माग्न चाहन्छु,” उनले सामाजिक सञ्जालमा लेखेकी छिन्, “मैले गरेका टिप्पणीहरू कमेडी कार्यक्रममा गरिएका थिए र ती टिप्पणीहरूलाई कहिल्यै गम्भीरतापूर्वक लिइने अपेक्षा थिएन ।”
पोस्टमा रजकले आफू राजेश हमालको बौद्धिकताबाट प्रेरित भएको समेत उल्लेख गरेकी छिन् । कार्यक्रममा आफूले महानायकको बारेमा, उनका महान कार्य र योगदानको बारेमा धेरै राम्रा कुराहरू पनि भनेको भए पनि ती दृश्य काटिएको उल्लेख गरेकी छन् ।
