काठमाडौँ । नक्कली सर्टिफिकेटको निहुँमा आफ्ना विरुद्ध सरकार लागेपछि बिच्किएका काँग्रेसका सांसद डा सुनिल शर्मा कोशीबाट आफ्नो हैसियत देखाइदिने भन्दै पूर्वतिर लागेका थिए । नभन्दै आज त्यसको परिणाम उनीहरुकै समूहको पक्षमा आयो, काँग्रेसको ‘विद्रोही’ समूहले सरकार बनायो ।
सभापति शेरबहादुर देउवासँग सुरुमा शेखर कोइराला समूहका नेताहरुले प्रचण्डको पञ्जाबाट बाहिर निकाल्न खोजेका थिए । तर लामो समयको रस्साकस्सीपछि पनि त्यो सम्भव भएन । प्रचण्ड सरकार अलोकप्रिय बन्दै गयो, त्यसको मोहरा काँग्रेस बन्दै गयो । त्यत्तिकैमा पक्राउ परेका थिए काँग्रेसकै सांसद डा सुनिल शर्मा ।
आफ्नै पार्टी सरकारमा रहेका बेला अर्थमन्त्री डा प्रकाशशरण महत र गृहमन्त्री नारायणकाजी श्रेष्ठले आफूलाई पक्राउ गरे भनेर डा शर्मा जसरी भूमिगत गिरोहजस्तो गरी लागेका थिए, त्यसको परिणाम शनिबार निस्किएको छ । कोशी सरकारको परिणामले उनलाई लखेटिरहेको वर्तमान सरकार लगभग धरापमा पर्न लागेको देखिएको छ ।
शनिबार परिणाम यस्तो देखियो आफ्नै पार्टीमा बिद्रोह गरेर काँग्रेसको शेखर समूहले आफू पक्षीय मुख्यमन्त्री केदार कार्कीलाइ बनाइछाडे । काँग्रेस सभापति देउवा, प्रधानमन्त्री पुष्पकमल दाहाल प्रचण्ड मात्र होइन राष्ट्रपति रामचन्द्र पौडेललाई समेत शेखरलाई दबाब दिन लगाए । तर त्यसको दरिलो टेकोमा थिए महामन्त्रीद्वय गगन थापा र विश्वप्रकाश अनि सांसद डा शर्मा ।
कार्कीले नाम फिर्ता लिएनन्, अवज्ञा नै गरे र अन्तत: मुख्यमन्त्री एमालेसँग मिलेर बने । यसले परिस्थिति यस्तो बन्यो कि एउटा कागजको खोस्टो बन्यो र जम्माजम्मी १८ शब्दमा लेखिएको यो गठबनधन बचाउँछौँ भन्ने कबुलियतीनामामा प्रचण्ड, देउवा र शेखरले सही गरे । अझै अर्को परिस्थिति त यस्तो बन्यो कि पार्टी सभापतिले नै आफ्नै पार्टीका अर्का नेतासँग सहमति गर्नुपर्यो त्यो पनि बडो टिठलाग्दो कागजको खोस्टोमा ।
यो सफलतापछि अहिले अब त्यहाँको संसदीय दलको नेता समेत फेर्ने तयारी सो समूहले थालिसकेको छ । सुनिँदैछ यसको जिम्मेवारी पनि डा शर्माले लिएका छन् । अहिले मुख्यमन्त्रीको पक्षमा देखिएका ९ जना बाहेक अब त्यहाँ संसदीय दलको नेता छान्नका लागि काँग्रेसका २८ जना सांसदमध्ये ६ जना आवश्यक छ र ती ६ जनालाई शेखर समूहका पक्षमा ल्याउने जिम्मा पनि शर्माले लिएका छन् ।
कोशीको कहर काठमाडौँ प्रवेश गर्ने निश्चितै छ । यो कोशीे सरकारले आउने ३० दिन भित्र विश्वासको मत लिएपछि यो अभियानको तीर काठमाडौँतिर सोझिने देखिँदैछ । आजको दृश्य हेर्दा त बलियो टेकोमा उभिएको छ कोशीको प्रदेश सरकार । अब यसले प्रचण्ड नेतृत्वको सत्ता गठबन्धनलाई ताक्ने नै देखिएको छ ।
कोशी सरकारको गठनका विषयमा शनिबार गरिएको तीन नेताको हस्ताक्षरको कमजोर कबुलियतनामाले पनि कोशीको भेल काठमाडौँसम्मै आउँछ भन्नेहरु धेरै छन् । यसले सभापति देउवालाई अब प्रचण्डसँगको गठबन्धन तोडेर आफू प्रधानमन्त्री बन्ने कि एमालेको सहयोगमा बन्ने शेखर कोइरालको सरकारलाई समर्थन गर्ने भन्ने धर्म संकटमा धकेलिदिएको छ ।
शेखर समूहको अबको गृहकार्य कोशी सरकारलाई विश्वासको मत दिलाउनु हो । त्यसपछि काठमाडौँमा कोशी छिराउन हतारिएका छन् डा शर्माहरु । देउवालाई प्रचण्डको पञ्जाबाट बाहिर निकाल्न उनीहरुको अस्त्र कोशी मार्ग नै बन्नेछ ।
