काठमाडौं । कोशी प्रदेशको मुख्यमन्त्रीमा गठबन्धनकै दुई नेताको दाबी पेश भएको छ ।
एमालेको समर्थनमा नेपाली कांग्रेसका सांसद केदार कार्की र गठबन्धनका सासंदहरुको समर्थनमा माओवादी केन्द्रका सांसद इन्द्र आङ्बोले छुट्टा छ्ट्टै दाबी पेश गर्नुभएको छ ।
केदारले कांग्रेसका ८ सहित एमालेका ४० सांसदको हस्ताक्षर बुझाउनु भएको छ भने आङ्बोले चार दलका संसदीय दलका नेताको हस्ताक्षर बुझाउनु भएको छ । कार्कीलाई नेपाली कांग्रेसको शेखर कोइराला पक्षका ९ प्रदेशसभा सदस्यसहित एमाले सांसदहरुले समर्थन गरेका छन् ।
कोशीमा कांग्रेस २९ प्रदेश सांसद छन्, उनीहरुमध्ये ९ जना कोइराला पक्षमा छन् । रामकुमार खत्री, लिलाकुमारी राई, शमशेर राई , गोविन्द गिरी, इन्दिरा थापा, मानबहादुर लिम्बू, सुनिता गुरुङ र केदार कार्की र हिमाल कार्की केदारको पक्षमा उभिनु भएको छ ।
कोशीका मुख्यमन्त्री हिक्मत कार्कीले असोज २० गते पदबाट राजीनामा दिए पछि प्रदेश प्रमुख परशुराम खापुङ्गले असोज २६ गते अपराह्न ५ बजेभित्र संविधानको धारा १६८ को उपधारा ५ अनुसार मुख्यमन्त्रीमा दाबी पेश गर्न समय दिनु भएको थियो ।
यसैबीच नेपाली कांग्रेस कोशी प्रदेश संसदीय दलका उपनेता हिमाल कार्कीले उप नेताबाट राजीनामा दिनु भएको छ ।
उहाँले नयाँ सरकार गठन प्रक्रियामा असन्तुष्टि जनाउँदै राजीनामा दिनु भएको जनाउनु भएको छ । राजीनामा दिएलगत्तै उहाँ कार्कीको पक्षमा उभिनु भएको छ ।
