काठमाडौं: मुलुकको शान्ति सुरक्षा सम्वेदनशील रहेको अवस्थामा नेपाल प्रहरीको उच्च नेतृत्व विदेश भ्रमणमा रहेको छ ।
प्रहरी महानिरीक्षक बसन्त बहादुर कुँवर प्रहरी अतिरिक्त महानिरीक्षक टेक प्रसाद राईलाइ जिम्मेबारी दिएर असोज २२ गतेदेखि २६ गतेसम्मका लागि बेलायत भ्रमणमा जानु भएको छ ।
महानिरीक्षक बेलायत रहैकै अवस्थामा निमित्त प्रहरी महानिरीक्षकको जिम्मेवारी सम्हाल्नु भएका प्रहरी अतिरिक्त महानिरीक्षक टेक प्रसाद राई अर्को सम्मेलनका लागि भन्दै अमेरिका जानु भएको छ ।
अमेरिकाको सान डिएगो, क्यालिफोर्नियामा असोज २७ देखि ३० गतेसम्म संचालन हुने एक कार्यक्रममा सहभागी हुन उहाँ अमेरिका जानु भएको प्रहरीले जनाएको छ ।
उहाँको अनुपस्थितिमा प्रहरी अतिरिक्त महानिरीक्षक दिपक थापाले नेपाल प्रहरी प्रधान कार्यालयको दैनिक प्रशासनिक कामकाजको जिम्मेवारी सम्हाल्नु हुने प्रहरी प्रधान कार्यालयले जनाएको छ ।
महानिरिक्षक थापासंग प्रहरी नायव महानिरीक्षक बिष्णु कुमार केसी, प्रहरी वरिष्ठ उपरीक्षकद्वय दान बहादुर कार्की र शेखर खनाल भ्रमणमा सहभागी हुनुहुन्छ । त्यसैगरी निमित्त प्रहरी महानिरीक्षक प्रहरी अतिरिक्त महानिरीक्षक टेक प्रसाद राईका साथै प्रहरी नायव महानिरीक्षकद्वय दुर्गा सिंह र केदार ढकाल सम्मिलित रहनुभएको छ ।
यतिबेला नेपाली सेनाका प्रधान सेनापति पनि बेलायत यात्रामा हुनुहुन्छ ।
प्रधानमन्त्री, उपप्रधानमन्त्री, मन्त्रीहरुका साथै नेपाल सरकारका उच्च तहका कर्मचारीहरु लगायत संसदका सभामुख, उपसभामुख, राष्ट्रिय सभाका अध्यक्ष समेतका व्यक्तिहरु महिनैपिच्छे विदेश यात्रामा रहेका छन् ।
सशस्त्र प्रहरीका महानिरीक्षक राजु अर्याल पनि मंगलबार अमेरिका भ्रमणमा जानु भएको छ । विश्वका प्रहरी प्रमुखहरुको सम्मेलनमा भाग लिन उहाँ अमेरिका जानु भएको हो ।
यस्ता भ्रमणलाई लिएर सार्वजनिक रुपमै आलोचना भइरहे पनि भ्रमणको संख्यामा कमी आएको पाइन्न ।
फोटो -प्रहरी प्रधान कार्यालय
