एजेन्सी । एकदिवसीय विश्वकप २०२३ को खेलमा इंग्ल्याण्डले पहिलो जित निकालेको छ । डिफेन्डिङ च्याम्पियनले बंगलादेशलाई धर्मशालामा १३७ रनको ठूलो अन्तरले पराजित गरेको हो ।
विश्वकपमा बंगलादेशविरुद्धको टोलीको यो सबैभन्दा ठूलो जित हो । टस जितेर पहिले ब्याटिङ गरेको इंग्ल्याण्डले निर्धारित ५० ओभरमा ९ विकेट गुमाएर ३६४ रन बनाएको थियो । जवाफमा बंगलादेश ४८.२ ओभरमा २२७ रन बनाएर अलआउट भयो ।
इङ्ल्यान्डका लागि डेभिड मलानले १४० रन बनाए, उनलाई जो रुटले ८२ रनको इनिङ्ससहित साथ दिए ।
धर्मशालाको ग्रीन टप विकेटमा बंगलादेशले टस जितेर पहिले बलिङ रोजेको थियो । उनको यो निर्णय सहि थियो, इङ्ल्यान्डका ब्याट्सम्यानले पहिलो खेलबाट पाठ लिएर यसपटक सावधानी अपनाए । पिच र परिस्थिति अनुकूल भएपछि ओपनर जोनी बेयरस्टो र डेभिड मलानले तीव्र गतिमा रन बनाउन थाले ।
बेयरस्टोको अर्धशतकपछि जो रुटले पनि ८२ रनको इनिङ खेले । उनले मलानसँग १५१ रनको साझेदारी गर्दै टोलीको स्कोर ३ सयभन्दा माथि पुर्याएका थिए । मलान १४० रन बनाएर आउट भए भने रुट ८२ रन बनाएर आउट भए ।
४० ओभरमा ३ सय रन बनाएको इंग्ल्याण्डले ४ सय रन बनाउने देखिन्थ्यो । तर अन्तिम १० ओभरमा बंगलादेशी बलरले ६ विकेट लिए र इंग्ल्याण्डलाई ६४ रन मात्रै बनाउन दिए । बलिङतर्फ मेहदी हसन मिराजले ४ तथा शोरिफुल इस्लामले ३ विकेट लिए ।
बंगलादेशमाथिको ठूलो जितपछि इंग्ल्याण्ड अंक तालिकाको १०औंबाट छैटौंमा उक्लिएको छ । टोलीको २ अंक छ । बंगलादेशको २ खेलमा १ जित र १ हारका साथ २ अंक छ भने टोली पाँचौं स्थानमा छ ।
