एजेन्सी । आईसीसी विश्वकप २०२३ मा अष्ट्रेलियाविरुद्धको पहिलो खेल गुमाएका भारतीय ब्याट्सम्यान शुभमन गिलको स्वास्थ्यमा ठूलो अपडेट आएको छ । भारतीय क्रिकेट कन्ट्रोल बोर्ड (बीसीसीआई)ले गिल भारतीय टोलीसँग दिल्ली नजाने र चेन्नईमा मात्रै रहने बताएको छ ।
बोर्डले बुधबार अफगानिस्तानविरुद्धको खेलमा युवा ओपनिङ ब्याट्सम्यान उपलब्ध नहुने पनि जनाएको छ ।
बीसीसीआईले सामाजिक सञ्जाल एक्समा शुभमन गिलको स्वास्थ्यसँग सम्बन्धित अपडेट सेयर गरेको छ । बोर्डले गिल हालसम्म निको नभएको र उनी चेन्नईमा मात्रै बस्ने बताएको छ । गिल चेन्नईमा मेडिकल टोलीको निगरानीमा रहनेछन् ।
यससँगै भारतीय ब्याट्सम्यानले अक्टोबर ११ मा अफगानिस्तानविरुद्धको खेल पनि गुमाउने छन् । बोर्डका अनुसार गिल अक्टोबर ९ मा टीम इण्डियासँग चेन्नईबाट दिल्ली जाने छैनन् ।
आईसीसी विश्वकप २०२३ मा अष्ट्रेलियाविरुद्धको खेलअघि शुभमन गिललाई डेंगुले सताएको थियो । गिलको डेंगु परीक्षणको रिपोर्ट पोजेटिभ आएपछि उनले प्रतियोगिताको पहिलो खेल गुमाउनु परेको थियो । शुभमन गिल लगातार दोस्रो खेलबाट बाहिर हुनु पक्कै पनि भारतीय टोलीका लागि नराम्रो खबर हो । गिल अक्टोबर १४ मा पाकिस्तानविरुद्ध मैदान उत्रने कि उत्रँदैनन्, त्यो पनि रोचक हुनेछ ।
गिलले सन् २०२३ मा एकदिवसीय क्रिकेटमा राम्रो प्रदर्शन गरेका छन् । उनले मात्र २० ओडीआईमा १२३० रन बनाएका छन्, जसले गर्दा उनी यस वर्ष यो ढाँचामा सर्वाधिक रन बनाउने खेलाडी बनेका छन् । शुभमन गिलले यो वर्ष पाँच शतक र पाँचै अर्धशतक बनाएका छन् ।
शुभमन गिलको स्थानमा इशान किशनलाई अष्ट्रेलियाविरुद्धको प्लेइङ इलेभेनमा मौका दिइएको थियो । तर, इशान विश्वकपको डेब्यु खेलमा नराम्ररी फ्लप भए । अष्ट्रेलियन बलर मिचेल स्टार्कको आउटगोइंग बलमा इशान गोल्डेन डकमा पेभिलियन फर्किएका थिए ।
