एजेन्सी । इजरायलमा हमासले सुरु गरेको आक्रमणमा परि इजरायल र गाजामा १,१०० भन्दा बढी मानिस मारिएका छन् ।

गाजामा रहेको प्यालेस्टाइनी लडाकु समूह हमासले शनिबार गरेको आक्रमणपछि इजरायलले आइतबार औपचारिक रूपमा युद्धको घोषणा गरेको थियो। ‘अपरेसन अल-अक्सा फ्लड’ भनेर चिनिने हमासको अपरेसनबाट सुरु भएको जारी द्वन्द्वमा दुवै पक्षका १,१०० भन्दा बढीको मृत्यु भएको छ भने हजारौं घाइते भएका छन्।

यस्तै, इजरायली उद्धारकर्मीले संगीत महोत्सव गरिएको स्थानबाट एकैपटक कम्तीमा २६० जनाको शव निकालेका छन् । राज्यको दक्षिणी भागमा रहेको रेइम नजिक आयोजना गरिएको सुपरनोभा फेस्टिभलमा हमास लडाकुले हमला गरेका थिए । त्यहाँ आक्रमणपछि मानिसहरू भागाभाग गरेको भिडिओहरू सार्वजनिक भएका छन् । इजरायली उद्धार सेवा ‘जिका’ ले आइतबार त्यहाँ खोजतलास गर्दा ठूलो संख्यामा हताहति भएको पाइएको हो ।

यो पनि पढ्नुहोस: इजरायल – हमास आक्रमणमा परी १० नेपालीको निधन

हमासले इजरायलमा ट्रिपल आक्रमण सुरु गरेको थियो । दशकौँ यताको सबैभन्दा रक्तपातपूर्ण द्वन्द्वमा हमासले शनिबार व्यापक स्थल, हवाई र समुद्री आक्रमण गरेको थियो । हमासले सैनिक र सर्वसाधारणलाई बन्धक बनाएपछि इजरायलका प्रधानमन्त्री बेन्जामिन नेतन्याहुले ‘लामो र कठिन’ युद्ध हुने चेतावनी दिएका थिए ।