युरोपेली क्लबहरुको फुटबल प्रतियोगिता युरोपा लिग अन्तर्गत शुक्रबार राति भएको खेलमा लिभरपुलले आफ्नो गृह मैदान एन्फिल्डमा युनियन सेन्ट जिलोजलाई २–० गोल अन्तरले पराजित गरेको छ ।
सेन्ट जिलोज यस सिजनमा बेल्जियम फुटबल लिगको शीर्ष स्थानमा रहेको छ ।
यो जितसँगै लिभरपुलले चार क्लब सहभागी समूह ई मा लगातार दोस्रो जित निकालेर ६ अंक बटुलेको छ, र समूहमा पहिलो स्थानमा छ । दोस्रो स्थानमा भने ४ अंकका साथ टुलोज क्लब छ ।
गृह मैदान एन्फिल्डमा लिभरपुलले जिलोजमाथि लगातार दबाब सिर्जना गरेको थियो । यद्यपी लिभरपुलले पहिलो गोल भने ४४ औं मिनेटमा मात्र गर्न सकेको थियो । लिभरपुलका लागि पहिलो गोल रायन ग्राभेनबर्चले गरेका थिए । उनी यसै सिजन बायर्न म्युनिखबाट लिभरपुल स्थानान्तरण भएका हुन् ।
दोस्रो हाफको अतिरिक्त समय ९२ औं मिनेटमा डिएगो जोटाले क्लबका लागि दोस्रो गोल गरेका थिए । एजेन्सी
