काठमाडौँ । सशस्त्र प्रहरीले गोताखोर तालिमका प्रशिक्षार्थीलाई सप्तकोशी नदीमा अभ्यास गराएको छ ।
गोताखोर तालिमका सहभागी प्रशिक्षार्थी कर्मचारीलाई सशस्त्र प्रहरी बल नेपाल नम्बर १ बराह बाहिनी मुख्यालय पकलीले सप्तकोशी नदीको ब्यारेजमा अभ्यास गराएको हो ।
४० दिने तालिममा सहभागी २० जना सुरक्षाकर्मीलाई बराह बाहिनीले नदीको गहिराई र बहाव ज्यादा रहेको क्षेत्रमा अभ्यास गराउँदै आएको छ । पानी मुनिको गहिराईमा पुगेर गरिने खोज तथा उद्धारमा खटिने जनशक्तिको संख्या बढाउने संगठनको नीतिअनुसार कोशी प्रदेशमा सञ्चालित गोताखोर तालिमका सहभागीलाई सप्तकोशीको भेल र गहिराईमा अभ्यास गराइएको बराह बाहिनीले जनाएको छ ।
बाहिनीपति सशस्त्र प्रहरी नायव महानिरीक्षक अञ्जनीकुमार पोखरेलले कोशी प्रदेश सरकार आन्तरिक मामिला तथा कानून मन्त्रालयको समन्वयमा गोताखोर तालिम सञ्चालनमा ल्याएको बताउनु भयो । १८ जना सशस्त्र प्रहरी र २ जना जनपथ सम्मिलित गोताखोर तालिम संगठनको चौथो ब्याच रहेको पोखरेलले बताउनु भयो । पोखरेलकाअनुसार हाल देशभर ७४ जनाको संख्यामा रहेको जनशक्ति चौथो ब्याच पश्चात ९४ को संख्यामा पुग्नेछ ।
उक्त जनशक्ति देशभर आइपर्ने विपद्, खोज तथा उद्धारमा खटिने सशस्त्र प्रहरी नायव महानिरीक्षक पोखरेलले बताउनु भयो । चौथो ब्याचका जनशक्तिलाई सप्तकोशी पश्चात त्रिशुली नदी र फेवा तालमा अभ्यास गराइने पोखरेलले बताउनु भयो । गोताखोर तालिमको अभ्यासका क्रममा कोशी प्रदेश प्रहरी प्रमुख प्रहरी नायव महानिरीक्षक राजेशनाथ बास्तोला सहितको उपस्थिति रहेको थियो ।
