काठमाडाैंः बझाङमा गत मंगलबार गएको ६.३ म्याग्नीच्युडको भूकम्प र त्यसपछिका लगातारका परकम्पबाट भएको जनधनको क्षतिका बारेमा स्थलगत रूपमै बुझ्न यतिबेला राष्ट्रिय स्वतन्त्र पार्टी (रास्वपा) का अध्यक्ष रबि लामिछाने बझाङ पुग्नु भएको छ ।
उहाँले भूकम्पबाट भएको क्षतिका बारेमा प्रशासन र सुरक्षा निकायसँग छलफल गर्नु भएको रास्वपाको सचिवालयले जनाएको छ ।
अध्यक्ष लामिछानेले भूकम्प प्रभावितका लागि लगेका टेन्ट लगायतका सामग्री प्रमुख जिल्ला अधिकारीलाई बुझाउनु भएको छ ।
लामिछानेले सामाजिक संजालमा लेख्नु भएको छ, भूकम्प प्रभावित बझाङका कैयाैं परिवार अस्थायी आवासमा छन् । तिनकाे उचित व्यवस्थापनमा स्थानीय सरकार र प्रशासनले सक्दाे प्रयास गरेका छन् । तर, त्याे मात्र प्रयाप्त नहुन सक्छ । त्यसैले, सहृदयी महानुभावहरुले जिल्ला प्रशासन कार्यालय, बझाङसँग समन्वय गरेर मात्रै सहयाेग गर्न हुन आह्वान गर्दछु ।
उहाँले अगाडि लेख्नु भएको छ, आज दिनभर प्रभावित ठाउँहरुमा पुग्नेछु । यस्तो दुःखमा पनि हाँसेर स्वागत गर्नु हुने बझाङवासीहरु भगवान जस्ता रहेछन् । तपाईको दुःख केन्द्रसम्म लैजाने इमानदार कोशिस गरिरहनेछु ।
