काठमाडौं: संयुक्त राष्ट्रसंघका महासचिव एन्टोनियो गुटेरेस यही महिना नेपाल भ्रमणमा आउन लागेको प्रधानमन्त्रीको स्वकीय सचिवालयले जनाएको छ । यद्यपी यस भ्रमणका बारेमा आधिकारिक घोषणा हुन बाँकी छ ।
आगामी असोज २६ गते गुटेरेस नेपाल आउन लागेको प्रधानमन्त्रीको सचिवालयको भनाई छ । स्रोतका अनुसार, महासचिव गुटेरेस तीन दिन नेपालमा रहने कार्यक्रम छ । नेपाल भ्रमणका क्रममा उनले खासगरी शान्ति प्रक्रियाका विषयमा प्रधानमन्त्री र अन्य दलका शीर्ष नेताहरुसँग छलफल गर्नेछन् ।
हालै राष्ट्रसंघको महासभामा भाग लिन न्यूयोर्क पुगेका बखत प्रधानमन्त्री पुष्पकमल दाहाल प्रचण्डले महासचिव गुटेरेसलाई नेपाल भ्रमणको निम्तो दिएको बताइएको छ । प्रधानमन्त्री प्रचण्डले मंगलबार बसेको माओवादी पदाधिकारी बैठकमा गुटेरेसको नेपाल भ्रमणबारे जानकारी गराएका थिए ।
तस्बिरः प्रदीपराज वन्त
