काठमाडाैंः मिनी संसदका रूपमा चिनिने संसदीय समितिका बैठकहरू नियमित रूमा बस्न थालेका छन् । आज एकै पटक चार वटा संसदीय समितिको बैठक बस्न लागेको संसद सचिवालयले जनाएको छ । जसअन्तर्गत बिहान साढे ११ बजे उद्योग तथा वाणिज्य र श्रम तथा उपभोक्ता हीत समितिको बैठक बस्दैछ ।
बैठकमा नेपालमा उत्पादित सुपारी निकासी सम्बन्धमा सरोकारवालासँग छलफल हुनेछ भने दिउँसो १ बजे बस्ने राष्ट्रिय सरोकार तथा समन्वय समितिको बैठकमा सीमा सुरक्षा तथा व्यवस्थापनमा देखिएका प्रमुख सवाल, समस्या तथा चुनौति र भावी कार्यदिशाका बारेमा छलफल हुनेछ ।
त्यस्तै बिहान ११ बजे बस्ने पूर्वाधार विकास समितिको बैठकमा सडक पूर्वाधारको अवस्था र सार्वजनिक सवारी साधनका सम्बन्धमा भौतिक पूर्वाधार तथा यातायात मन्त्रालयसँग छलफल हुनेछ । ग्वार्को स्थित निर्माणाधिन फलाइओभर, कलंकीदेखि वसुन्धारासम्म चक्रपथ बिस्तार आयोजना र कालिमाटी स्थित विष्णुमती खोलामा निर्माण सम्पन्न भइ प्रयोगमा नआएको पुलको स्थलगत निरीक्षण लगायतका विषयमा छलफल हुनेछ ।
मध्यान्ह साढे १२ बजे बस्ने प्रत्यायोजित व्यवस्थापन तथा सरकारी आश्वासन समितिको बैठकमा सरकारी आश्वासन कार्यान्वयन अवस्थाको स्थलगत अध्ययन, अवलोकनबाट देखिएका विषयहरुका सम्बन्धमा उर्जा, जलश्रोत तथा सिंचाई मन्त्रालयसँग छलफल हुनेछ ।
