काठमाडौँ । सरकारले आज स्थानीय तहको निर्वाचनको मिति घोषणा गर्ने तयारी गरेको छ । आइतबार तीन दलका शीर्ष नेताबीच प्रधानमन्त्री निवास बालुवाटार भएको बैठकमा प्रधानमन्त्री शेरबहादुर देउवाले अबको मन्त्रिपरिषद् बैठकले स्थानीय तहको निर्वाचनको मिति घोषणा गर्ने बताएको समाचार छ ।
यसअघि बैठकमा प्रमुख प्रतिपक्षी नेकपा (एमाले) ले स्थानीय तहको निर्वाचन समयमै गर्न आग्रह गरेको थियो । एमसीसी सम्झौता र स्थानीय तहको निर्वाचनका सम्बन्धमा आइतबार प्रधानमन्त्री देउवा, प्रमुख प्रतिपक्षी दल एमालेका अध्यक्ष केपी शर्मा ओली र सत्तारुढ गठबन्धनको एक घटक नेकपा माओवादी (केन्द्र) का अध्यक्ष पुष्पकमल दाहाल प्रचण्डबीच छलफल भएको थियो ।
सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले अब बस्ने मन्त्रिपरिषद्को बैठकले निर्वाचनको मिति घोषणा गर्ने बताउनुभएको छ । आज सोमबार मन्त्रिपरिषद्को नियमति बैठक बस्ने दिन पनि हो । पाँच दलीय सत्तारुढ गठबन्धनभित्र आगामी जेठ ४ गते स्थानीय तहको निर्वाचन गर्नेसम्बन्धमा सहमति भइसकेको बताइएको छ । निर्वाचन आयोगले पनि सरकारलाई जेठ ४ गते निर्वाचन गर्न प्रस्ताव गरेको छ ।
