काठमाडौँ । इन्डो–प्यासिफिक सैन्य प्रमुख सम्मेलनमा सहभागी हुन प्रधानसेनापति प्रभुराम शर्मा भारत प्रस्थान गरेका छन् ।
नयाँ दिल्लीमा आयोजना हुन लागेको तेह्रौँ संस्करणको इन्डो–प्यासिफिक आर्मिज् चिफ कन्फरेन्स (आईपीएसीसी) मा सहभागिताका लागि उनी आज त्यसतर्फ प्रस्थान गरेका हुन् ।
प्रधान सेनापतिलाई त्रिभुवन अन्तर्राष्ट्रिय विमानस्थलमा बलाधिकृत रथी श्री सरोज प्रताप राणाले बिदाई गरेका थिए । सो अवसरमा रथीवृन्द, रक्षा मन्त्रालयका पदाधिकारी लगायत सैनिक अधिकृतहरुको उपस्थिति रहेको थियो । भारत प्रस्थान गर्नु पूर्व आजै प्रधान सेनापतिलाई जंगी अड्डामा सेनाको एक टुकडीले सम्मान गारत अर्पण गरेको थियो ।
प्रधान सेनापतिको अनुपस्थितिमा बलाधिकृत रथी श्री सरोज प्रताप राणाले कायममुकायम प्रधान सेनापतिको कार्यभार सम्हाल्नेछन् ।
भारत र संयुक्त राज्य अमेरिकाका सेनाहरूको सह-आयोजनामा असोज ८ गतेदेखि १० गतेसम्म सञ्चालन हुने सम्मेलनमा सहभागी हुन उपरथी योगराज शर्मा, महासेनानी वसन्त बहादुर गौतम, सेना प्रमुख सुबेदार रत्न बहादुर थापा मगर पनि भारततर्फ प्रस्थान गरेका छन् ।
भ्रमण कार्यक्रम सकेर प्रधानसेनापतिको नेतृत्वको टोली असोज ११ गते स्वदेश फर्कने कार्यक्रम छ ।
