काठमाडौँ । मुस्लिम इत्तेहाद संगठन नेपालका अध्यक्ष तथा इन्चार्ज ताज मोहम्मद मियाले राजनीतिक अभियानमा मुस्लिम समुदायलाई उपयोग मात्र गरिएको तर अधिकार नदिइएको भन्दै असन्तुष्टि जनाउनु भएको छ ।
“फेरि मुस्लिम समुदाय अधिकारका लागि उठ्नु पर्ने अवस्था आएको छ”, उहाँले भन्नुभयो । नेपाली मुस्लिम समुदाय धार्मिक सहिष्णुता ,सामाजिक सद्भाव, राष्ट्रिय एकता र स्वाधीन देश नेपालको अभियानमा रहेको उल्लेख गर्दै उहाँले त्यसका लागि पुनः उठ्नु पर्ने जनाउनुभयो । हिजो जुनसुकै आन्दोलनमा यो समुदायले आफ्नो ज्यानको आहुती समेत दिन पछि नपरेको उल्लेख गर्दै उहाँले देशप्रति दायित्व पूरा गर्न कुर्बानीसमेत दिएको ज्वलन्त प्रमाण ताजै रहेको स्पष्ट गर्नुभयो ।
अध्यक्ष मियाले मुस्लिम समुदायको सम्मानसहित जिउन र संवैधानिक अधिकारको व्यवहारमा प्रयोग सुनिश्चित गर्न एकचोटि आफ्नो लागि उठ्नु पर्ने अवस्था आएको जनाउनुभयो ।
उहाँले नेपाल र नेपालीको भलो नचाहने उग्र तत्व र विदेशीको आँखामा घरीघरी बिजाउने र मुस्लिम समुदायको हत्यासमेत हुने गरेको स्मरण गर्नुभयो । उहाँले नेपाली मुस्लिम समुदाय बिनाबर्दीको सेना भएको उल्लेख गर्दै राष्ट्रवादको विषयमा पटक पटक परीक्षा दिनुपरेको गुनासो गर्नुभयो ।
