काठमाडौँ । आज नवौँ संविधान दिवश । सरकारले टुँडिखेलमा औपचारिक समारोह गरेर संविधान दिवस मनाएको छ ।
देशभर पनि संविधान दिवस मनाउन विविध कार्यक्रम गर्न सरकारले उर्दी जारी गरेको छ । त्यस्तै सरकारी निकायलाई पनि साँझ दिपावली गर्न सरकारले उर्दी जारी गरेको छ ।
सोही बमोजिम पारम्पारिक दिवस मनाउने अरुजस्तै संविधान दिवसका लागि पनि टुँडीखेलमा सरकारी मान्छे आए । नवौँ संविधान दिवशको समारोह सुरु भएको घोषणा गरियो र भाषण गरियो ।
सर्वसाधारण जनताले भने यसअघिजस्तै टुँडिखेल बाहिर उभिएरै रेलिंगबाट दिवसको कार्यक्रम हेरे । तर आज निरश थियो संविधान दिवस । देशले यो दिवस मनाइरहँदा देशमा न प्रधानमन्त्री छन् नत संसदका सभामुख नै । प्रधानमन्त्री अमेरिका र सभामुख आयरल्याण्ड छन् । प्रधानमन्त्री संयुक्त राष्ट्रसंघलाई सम्बोधन गर्न अमेरिका पुगेका छन् । जबकी यो सम्बोधन गतवर्ष परराष्ट्र सचिवले गरेका थिए भने त्यो भन्दा अघिल्लो वर्ष मन्त्रीले । संयुक्त राष्ट्रसंघलाई सम्बोधन गर्न अब देशका प्रधानमन्त्री तथा राष्टपतिहरु जाने प्रचलनमा अब धेरै कमी आएको छ । अहिले नै पनि धेरै देशका गएका छैनन् ।
संविधान जारी गर्ने पूर्व राष्ट्रपति डा रामबरण यादव विरामी छन् । उनी वीर अस्पताल भर्ना भएका छन् । यो संविधान निर्माणमा ठूलो भूमिका निर्वाह गरेका संविधानसभाका अध्यक्ष सुवासचन्द्र नेम्वाङको निधन भएको १३ दिन पुगेको छैन । यतिखेर संविधान सभाका दिन उनको पनि देशभरि स्मरण भइरहेको छ । उता संविधान जारी गर्ने प्रधानमन्त्री सुशील कोइराला पनि हामी बीच छैनन् । उनको पनि आजका दिन स्मरण भएको छ ।
टुँडिखेलमा जारी संविधान दिवस कार्यक्रमलाई कार्यबाहक प्रधानमन्त्रीले सम्बोधन गरेका छन् । यो हाम्रो राष्ट्रिय दिवस हो र वर्षेनि मनाउने गरिन्छ । तर यो थाहा भएपछि मिल्नेसम्मका कार्यक्रमहरुलाई छोटाएर या कटाएर मुलुकको कार्यकारी प्रधानमन्त्री समारोहमै बस्नुपर्दथ्यो । तर विदेश भ्रमणमा जान पाएपछि नेपालका नेताको मन लोभिने त पुरानै परम्परा हो, त्यसले अहिले पनि निरन्तरता पायो ।
यसैकारण कर्मकाण्डी र पारम्पारिक बन्यो संविधान दिवस । भव्य हुनुपर्ने राष्टिय दिवसको निरशपना नेपाली जनताले आजका दिनमा महसुस गरेका थिए ।
