एजेन्सी । दक्षिण अफ्रिकाले चौथो ओडिआई खेलमा अष्ट्रेलियालाई १ सय ६४ रनको फराकिलो अन्तरले पराजित गरेको छ । शुक्रबार सेन्चुरियनमा भएको खेलमा हेनरिक क्लासेनको १ सय ७४ रनको विष्फोटक इनिङमा दक्षिण अफ्रिकाले जित हात पारेको हो । योसँगै पाँच ओडिआई खेलको सिरिज २–२ को बराबरी अवस्थामा पुगेको छ ।
जितको लागि ४ सय १७ रनको विशाल विजयी लक्ष्य पाएको अष्ट्रेलिया ३४.५ ओभरमा २ सय ५२ रनमा अल आउट भयो । अष्ट्रेलियाका एलेक्स केरी ९९ रनमा आउट भए । उनले ७७ बलमा ९ चौका र ४ छक्का प्रहार गरे ।
केरीबाहेक अष्ट्रेलियाका अन्य कुनैपनि ब्याटरले राम्रो प्रदर्शन गर्न सकेनन् । टिम डेविड ३५, डेविड वार्नर १७, ट्रविस हेड १७, मिचेल मार्श ६, मार्नस लाबुसेन २०, मार्कस स्टोइनिस र नाथन एलिसले १८/१८ रन बनाए ।
दक्षिण अफ्रिकाका तीव्र गतिका बलर लुन्गी एनगिडीले सर्वाधिक ४ विकेट लिए । कागिसो रबाडाले ३ विकेट लिदा मार्को यानसन र केशव महाराजले समान एक विकेट लिए ।
त्यसअघि सेन्चुरियनमा टस हारेर पहिला ब्याटिङ गरेको दक्षिण अफ्रिकाले निर्धारित ५० ओभरमा ५ गुमाउँदै ४ सय १६ रन बनाएको थियो । जसमा हेनरिक क्लासेनले मात्रै १ सय ७४ रनको विष्फोटक शतकीय इनिङ खेलेका थिए । उनले ८३ बलमा १३ चौका र १३ छक्का प्रहार गरे । डेविड मिलर ८२ रनमा नटआउट रहे । उनले ४५ बलमा ६ चौका र ५ छक्का प्रहार गरे । पाँचौं विकेटका लागि क्लासेन र मिलरले ९४ बलमा २ सय २२ रनको विष्फोटक दोहोरो शतकीय साझेदारी गरेका थिए ।
यस्तै, रास्सी भान डर डुसेनले ६२ रन बनाउदा ओपनर क्विन्टन डि कक ४५ र रिजा हेन्ड्रिक्स २८ रनमा आउट भए ।
अष्ट्रेलियाका जोश हेजलवुडले सर्वाधिक २ विकेट लिए । मार्कस स्टोइनिस, माइकल नेसेर र नाथन एलिसले समान एक विकेट लिए । एडम जाम्पाले १० ओभरमा विनाविकेट १ सय १३ रन खर्चिए ।
पहिलो खेलमा दक्षिण अफ्रिका ३ विकेट र दोस्रो खेलमा १ सय २३ रनले पराजित भएको थियो । तेस्रो खेलमा दक्षिण अफ्रिका १ सय ११ रनले विजयी भएको थियो । आइतबार सिरीजको पाँचौं तथा निर्णायक खेल हुनेछ ।
