रुपन्देही । लुम्बिनी प्रदेशको आज दिउँसो एक बजेदेखि बस्ने भनिएको प्रदेशसभा अधिवेशन अन्त्य गरिएको छ ।
आजै बिहान मुख्यमन्त्री शंकर पोखरेलले राजीनामा दिनुभएको थियो । मुख्यमन्त्री पोखरेलले आफूविरुद्धको अविश्वास प्रस्तावमा मतदान हुनुअघि नै मुख्यमन्त्री पदबाट राजीनामा दिनुभएको थियो । उहाँको राजीनामा प्रदेश प्रमुख धर्मनाथ यादवले तत्कालै स्वीकृत गरेको बताइएको छ ।
यता पोखरेलले एक सांसद माओवादीतिर लागेको सुइँको पाएपछि नयाँ सरकार गठनमा गोलमाल हुने निष्कर्षका साथ हतारहतार प्रदेशसभाको विशेष अधिवेशन अन्त्य गरेको बताइएको छ ।
लुम्बिनी प्रदेश सांसद विमला वली माओवादीमा प्रवेश गर्नुभएसँग मुख्यमन्त्री पोखरेलको बहुमत गुमेको छ।
दाङबाट प्रदेशसभा ३ खबाट वलीले नेकपाका तर्फबाट उप चुनाव जित्नुभएको थियो । माओवादी र एमाले विभाजित भएपछि उहाँ कता लाग्ने टुंगो नलाग्दै एमालेले उहाँलाई समेत जोडेर आफ्नो पक्षमा ४१ सांसद रहेको बताएको थियो ।
तर वलीले माओवादी कित्तामा जाने निर्णय गरेपछि मुख्यमन्त्री पोखरेलको बहुमत गुम्न पुगेको छ ।
