काठमाडौँ । ६० किलो सुन तस्करी प्रकरणमा भन्सारका कर्मचारीमात्रै ८ जना पक्राउ परेको सीआईबीले जनाएको छ ।
बुधबार नेपाल प्रहरीको केन्द्रीय अनुसन्धान ब्युरो (सीआईबी)ले पत्रकार सम्मेलन गर्दै उक्त प्रकरणमा त्रिभुवन विमानस्थल भन्सार कार्यालयका ८ जना कर्मचारी पक्राउ परेका जानकारी दिएको हो ।
सीआईबीको अनुसार यस प्रकरणमा भन्सार एजेन्ट ४ जना, कार्गो एजेन्ट ३ जना, ट्याक्सी चालक १ जना, भाषा अनुवादक १ जना, कम्पनी खोल्ने १ जना, कम्पनी खडा गर्ने र मालवस्तु व्यवस्थापक २ जना र सुनको कारोबारमा संलग्न ११ जना पक्राउ परेका छन् । यी सबैगरी ३२ जना पक्राउ परेको र अन्य १८ जना फरार रहेका छन्।
फरार रहेका १८ जनाको खोजिकार्य भईरहेको छ उनीहरुलाई खोज्नका लागि सबै विधिहरु अबलम्बन गरिएको डीआईजी यज्ञविनोद पोखरेलले जानकारी दिए । उनले फरारहरुलाई पक्राउ गर्नका लागि पर्पल नोटिस जारी गरिसकिएको बताए ।
६० किलो ७१६ ग्राम सुन तस्करी प्रकरणमा सीआईबीले १८ फरारसहित ५० जनालाई प्रतिवादी बनाउन जिल्ला अदालत काठमाडौँलाई राय दिएको छ ।
