विराटनगर । धरानमा मङ्गलवार भएको ‘ग्याङ फाईट’मा सङ्लग्न रहेको आरोपमा प्रहरीले उपमेयर अइन्द्र विक्रम बेघाका भाइ विष्णु बेघालाई नियन्त्रणमा लिएको छ ।
बेघा सहितको समूहले धरान १५ सूर्यवस्तीका सन्देश राईलाई कुतपिट गरेको आरोपमा उनलाई प्रहरीले अनुसन्धानका लागि नियन्त्रणमा लिएको हो ।
सुरुमा विष्णुको समूहले सन्देश राईलाई धारिलो हतियार प्रहार गरी घाइते बनाएको थियो । पछि फेरी सन्देशको समूहले उपमेयरका भाई विष्णुलाई घरैमा गएर कुटेको थियो ।
पुरानो रिसीइबीका कारण घटना भएको हुनसक्ने धरानका डीएसपी नवराज मल्लले बताए ।
विष्णुको समूहबाट कुटपिट भएका सन्देशको अवस्था चिन्ताजनक रहेको छ । उनको बिपी कोइराला स्वास्थ्य विज्ञान प्रतिष्ठानमा उपचार भइरहेको छ । यता, विष्णुको पनि टाउको र अनुहारमा चोट लागेको छ ।
प्रहरीले घटनामा संलग्न रहेको आरोपमा ८ जनलाई पक्राउ गरेको छ । प्रहरीले विष्णुको ग्याङबाट उनीसहित बाघवीर भन्ने सुरज तामाङ, मेनल तामाङलाई पक्राउ गरेको छ भने सन्देशको ग्याङबाट अमृत तामाङ, अनिल मगर, सागर भनिने दीपेन्द्र राई, सञ्जीव राईलाई पक्राउ गरेको छ ।
