काठमाडौँ । नेपाली कांग्रेसको केन्द्रीय पदाधिकारीको बैठक आज (मंगलबार) दिउँसो बस्दैछ ।
यद्यपि, बैठकमा सभापति एवम् प्रधानमन्त्री शेरबहादुर देउवा भने उपस्थित नहुने भएका छन् । सभापति देउवा व्यस्त भएपछि उनीबाहेक केन्द्रीय समितिका पदाधिकारीको बैठक केन्द्रीय कार्यालय सानेपामा बस्न लागेको हो ।
देउवाको अनुपस्थितिमा उपसभापति पूर्णबहादुर खड्काले पार्टीका पदाधिकारीहरूसँग अनौपचारिक रुपमा छलफल गर्दैछन् ।
बिहीबारका लागि देउवाले बोलाएको केन्द्रीय कार्यसम्पादन समितिको बैठकअघि त्यसको तयारीमा मंगलबार पदाधिकारी बैठक बस्न लागेको हो ।
कार्यसम्पादन समिति बैठकमा म्याद समाप्त भएका भ्रातृ संस्थाहरू र जिल्ला अधिवेशन हुन बाँकी रहेका जिल्लाहरूका बारेमा छलफल गर्ने एजेन्डा छन् ।
यस्तै सरकारले स्थानीय तहको निर्वाचनको मिति घोषणा गरिसकेकाले त्यसको तयारीका विषयमा समेत छलफल हुने बताइएको छ ।
