काठमाडौं । भारतीय राज्य पश्चिम बंगालमा हालै सम्पन्न विधानसभाको चुनावमा सत्तारुढ त्रिणमुल कङ्ग्रेस प्रचण्ड बहुमत तर्फ अग्रसर भएको छ । तर त्रिणमुलकै संस्थापक अध्यक्ष एवं मुख्यमन्त्री ममता बनर्जी भने पराजित हुनु भएको छ ।
बंगालको चुनावमा भारतीय जनता पार्टीले यसपटक निकै आक्रामक चुनाव प्रचार गरेको थियो । प्रधानमन्त्री नरेन्द्र मोदी, गृहमन्त्री अमित शाह, पार्टी अध्यक्ष जेपी नड्डा समेतका कैयौं नेताहरुले बंगालमा लगातार ठूलाठूला आमसभा गरेका थिए ।
दुई सयभन्दा बढी सिट जित्ने उदघोष सहित भाजपा चुनावी मैदानमा उत्रेको थियो ।
चुनावका क्रममा कैयौं ठाउँमा भाजपा र त्रिणमुल पार्टीका कार्यकर्ताबीच हिंसात्मक झडप पनि भएका थिए, र यसबाट केही व्यक्तिको ज्यान पनि गएको थियो ।
तर चुनावी परिणाम नितान्त भिन्न भयो । भारतीय संचार माध्यमहरुका अनुसार भाजपाले ७३–८० स्थान जित्ने अनुमान गरेका छन् । यो संख्या अघिल्लो पटकको चुनावमा प्राप्त परिणाम भन्दा राम्रो हो, तर सोचेजति सफलता प्राप्त भएन ।
त्रिणमुल कंग्रेसले २१५–२२० स्थान जित्ने पक्का देखिएको छ । अघिल्लो चुनावमा भन्दा यसपटक ममताको दलले बढी स्थान जित्ने देखिएको छ ।
भारतीय कम्युनिष्ट पार्टी माक्र्सवादीबाट सत्ता खोसेर पश्चिम बंगालमा स्थापित हुनुभएकी ममता बनर्जीको दल त्रिणमुल कंग्रेसले लगातार तेस्रो पटक चुनाव जितेर बंगालमा राज्य गर्ने देखिएको छ ।
तर ममता बनर्जी स्वयंले नन्दीग्रामबाट चुनाव हार्नु भएको छ । चुनाव अघि त्रिणमुल पार्टी परित्याग गरी भाजपा प्रवेश गर्नु भएका शुभेन्दु अधिकारीसँग ममता पराजित हुनु भएको हो ।
नेतृ ममता बनर्जीले आइतबार अपराह्न कोलकातामा पत्रकार सम्मेलन गरी चुनावमा आफू पराजित भएको स्वीकार गर्दै जनताले भारतीय जनता पार्टी र उसको सिद्धान्तलाई परास्त गरेकामा खुशी व्यक्त गर्नुभयो ।
यद्यपी निर्वाचन आयोगले अन्तिम चुनावी परिणाम आइतबार रातिसम्ममा सार्वजनिक गर्ने अनुमान गरिएको छ ।
