काठमाडौँ । संविधानसभाका अध्यक्ष एवं नेकपा (एमाले) का उपाध्यक्ष सुवास नेम्वाङको अन्त्येष्टि बिहीबार हुने भएको छ । अस्ट्रेलियामा रहेका एक छोरा नेपाल आइपुग्न ढिलाइ हुने भएकाले उहाँको अन्त्येष्टि बिहीबार हुने भएको हो ।
अस्ट्रेलियामा रहेका छोरा बुधबार बेलुका ५ बजेतिर मात्र आइपुग्ने बताइएको छ । एमाले पार्टी केन्द्रीय कार्यालय च्यासलमा नेम्वाङको पार्थिव शरीरलाई श्रद्धाञ्जली अर्पणका लागि बुधबार दिउँसो १ बजेसम्म राखिने पार्टी स्रोतले जनाएको छ ।
तत्पश्चात किराँत संस्कारअनुसार उहाँको पार्थिव शरीरलाई बेलुका पाँचबजेसम्म उहाँको घरमै राखिने र राजकीय सम्मानका साथ अन्त्येष्टि गर्ने सरकारको निर्णयबमोजिम नेपाली सेनाले नेम्वाङको पार्थिव शरीरको जिम्मा लिने बताइएको छ ।
बिहीबार कुन समयमा अन्त्येष्टि गरिने भन्नेबारे अहिलेसम्म तय भइनसकेको बताइएको छ । सरकारले नेम्वाङको अन्त्येष्टिका दिन नै सार्वजनिक बिदा दिने निर्णय गरेकाले बिहीबार सार्वजनिक बिदा हुने भएको छ ।
बालुवाटारस्थित निवासमा आज बिहान हृदयघात भएपछि नेम्वाङको त्रिवि शिक्षण अस्पताल लैजाने क्रममा बाटोमै निधन भएको थियो ।
