एजेन्सी । स्पेनिस ला लिगा अन्तर्गत शनिबार साँझ भएको खेलमा रियल मड्रिडले गेटाफेमाथि रोमाञ्चक जित निकालेको छ ।
इन्ज्युरी समयमा इंग्लिस मिडफिल्डर जुड बेलिङ्घमले निर्णायक गोल गर्दै म्याड्रिडलाई रोमाञ्चक जित दिलाए । खेल १-१ को बराबरीमा रहेको अवस्थामा उनले गोल गरेका थिए ।
घरेलु मैदान कोलिसियम अल्फोन्सो पेरेजमा भएको खेलमा गेटाफेले खेलको ११औं मिनेटमा अग्रता लिएको थियो । गेटाफेको लागि रियल म्याड्रिडकै पूर्व खेलाडी बोर्जा मायोरालले गोल गरेका थिए ।
खेलको २३औं मिनेटमा गेटाफेका कारलेस अलेनाले बेलिङ्घमलाई लडाएपछि म्याड्रिडले पेनाल्टीको अपील गरेको थियो । तर भिडियो असिस्टेन्ट रेफ्रीले त्यसलाई पेनाल्टी दिएनन् ।
३२औं मिनेटमा लुका मोड्रीचको हेडर र ४०औं मिनेटमा जोसेलुको प्रयास गेटाफेका गोलरक्षक डेविड सोरयाले विफल पारे ।
दोस्रो हाफको सुरुवाती समयमा मोड्रिचको उत्कृष्ट क्रसमा जोसेलुले गोल गर्दै खेललाई १-१ को बराबरीमा ल्याए ।
५४औं मिनेटमा म्याड्रिडका टोनी क्रूस र ६५औं मिनेटमा ड्यानी कार्वाजालको प्रहार गोलपोस्टमा लागेर बाहिरियो ।
त्यसपछि खेलको अन्तिम समयमा गोल गर्दै म्याड्रिडले जित हात पार्यो । लुकास भास्केजले लिएको सट सोरीयाले समात्न नसक्दा बेलिङ्घमले सजिलै गाल गरे ।
जितसँगै म्याड्रिड चार खेलमा १२ अंक सहित तालिकाको पहिलो स्थानमा छ भने गेटाफे चार अंक सहित १४औं स्थानमा छ।
