सुर्खेत । नेकपा (माओवादी केन्द्र) का अध्यक्ष एवम ्प्रधानमन्त्री पुष्पकमल दाहाल प्रचण्डले भ्रष्टाचारविरुद्धको लडाइँ नरोकिने बताउनुभएको छ ।
वीरेन्द्रनगरमा समाजवादी मोर्चाको सन्देश सभालाई सम्बोधन गर्दै प्रधानमन्त्री ले भ्रष्टाचारविरुद्धको लडाइँ सुरु भएको र अब यो नरोकिने बताउनुभएको हो ।
प्रधानमन्त्री प्रचण्डले यसमा सबै राजनीतिक दलहरुले सहयोग गर्नुपर्ने बताउनुभयो । कम्युनिस्ट आन्दोलनलगायतका विभिन्न आन्दोलनले नै नेपालमा परिवर्तन ल्याएको भन्दै उहाँले क्रान्तिकारीहरुले चनाखो र अझ ठूलो मोर्चा बनाउनुपर्ने बताउनुभयो ।
प्रधानमन्त्री प्रचण्डले विप्लवको सुरक्षा घेरामा आफूले जनयुद्ध अगाडि बढाएको उल्लेख गर्नुभयो । उहाले एमाले परिवर्तनको पक्षमा नरहेको बताउदै भन्नुभयो, ‘यो मोर्चा एक ठाउँमा भएर लड्दा भ्रष्टाचारविरुद्धको लडाइँ, सुशासनको लडाइँ सफल हुन्छ । अहिले धारे हात लगाएर हेरिरहेका छन् । उनीहरु नक्कली कम्युनिस्ट हुन्।’
प्रधानमन्त्री प्रचण्डले परिवर्तनको पक्षमा अग्रसर हुनु आफ्नो प्रमुख लक्ष्य रहेको बताउनुभयो। भ्रष्टाचारविरुद्धमा अग्रसर हुँदा कांग्रेस, एमालेलाई लक्षित गरेको भन्ने भनाई सहि नभएको उहाँको भनाई छ ।
