काठमाडौं । सर्वोच्च अदालतमा आजदेखि ‘पेशी तारेख अटोमेशन स्टिम’ शुरु हुने भएको छ । नवनियुक्त प्रधानन्यायाधीश विश्वम्भरप्रसाद श्रेष्ठले स्वचालित तारेख व्यवस्थापनको उद्घाटन गरी सुरुवात गर्न लागेका हुन् ।
मंगलबार बिहान ११ बजे प्रधानन्यायाधीश श्रेष्ठ आफैँले तारेख दिने स्थानमा गई स्वचालित तारेख व्यवस्थापनको सुरुवात गर्न लागेका सर्वोच्च अदालतका प्रवक्ता विमल पौडेलले जानकारी दिए ।
यसअघि दुई पक्षको सहमतिमा पेसी तारेख दिने गरेकामा आजबाट स्वचालित सिस्टमबाटै पेसी तारेख दिन लागिएको हो । अब मुद्दा दर्ता भएको मिति, विपक्षीको सङ्ख्या, अग्राधिकार पाएको नपाएको र कुन प्रकृतिको रिट वा मुद्दा हो, सोही अनुसार सिस्टमबाट नै पेसी तारेख उपलब्ध हुनेछ । सिस्टमबाटै तारेखको मिति तोकिँदा तारेख छिटो वा ढिलो आएको भनी आउने गरेको गुनासो सम्बोधन हुने पौडेलले बताए ।
आईतबार आयोजित पत्रकार सम्मेलनमा बोल्दै प्रधानन्यायाधीश श्रेष्ठले तारेख तोक्ने काममा कर्मचारीहरुको हस्तक्षेप हुन नदिने सो अटोमेशन सिष्टमको शुरुवात गर्नलागेको बताए ।
तत्कालका लागि सर्वोच्च अदालतबाट अटोमेटिक तारेख व्यवस्थापन सुरु गरिने र बिस्तारै उच्च र जिल्ला अदालतमा पनि स्वचालित तारेख व्यवस्थापन गर्ने तयारी रहेकोउनले बताए ।
