काठमाडौँ । मलेसियामा जारी महिला टी–२० आईमा नेपालले विजयी सुरुवात गरेको छ । चार देशबीचको सिरीजको पहिलो खेलमा हङकङलाई ६ विकेटले पराजित गर्दै नेपालले विजयी सुरुवात गरेको हो ।
हङकङले जितको लागि दिएको ८५ रनको लक्ष्य नेपालले १५.५ ओभरमा ४ विकेटको क्षतिमा पूरा गर्यो ।
नेपालका लागि सम्झना खड्का ३६ बल खेल्दा ५ चौका प्रहार गर्दै ३६ रनमा नटआउट रहिन् । राष्ट्रिय टिममा डेब्यू गरेकी ओपनर पूजा महतोले १६ रन बनाएर आउट भईन भने इन्दू वर्माले ९ रन जोडिन् । ओपनर विन्दू रावल शून्यमा आउट हुँदा कप्तान रूबिना क्षेत्री १० रन बनाईन् ।
त्यसअघि क्वालालम्पुरस्थित बायोमास ओभल क्रिकेट मैदानमा टस हारेर पहिले ब्याटिङ गरेको हङकङ पाँच बल खेल्न बाँकी छदा ८४ रनमा अलआउट भएको थियो । हङकङका लागि का यिङ चानले ३४ तथा शिङ यान दोरोथिया चानले १६ रन बनाउनु बाहेक अन्य खेलाडीले सम्झिन लायक रन बनाउन सकेनन् । हङकङको खातामा नेपालले चार अतिरिक्त रन थपेको थियो ।
बलिङमा नेपालकी सीता राना मगरले ४ ओभरमा १६ रन खर्चेर ५ विकेट लिइन् । इन्दू बर्माले २ विकेट लिईन भने कविता कुँवर र पूजा महतोले समान एक विकेट लिईन् ।
अब नेपालले भोलि कुवेत र शुक्रबार मलेसियासँग खेल्नेछ।
