काठमाडौं । नेपाली क्रिकेट टीम एसिया कप क्रिकेटका लागि पाकिस्तान जानुभन्दा अगाडि पशुपतिनाथ मन्दिर पुगेर आशीर्वाद लिएका छन् । राष्ट्रिय क्रिकेट टोली भोली पाकिस्तानतर्फ प्रस्थान गर्न लागेका हुन् । आज नेपाल क्रिकेट संघ (क्यान) ले टीमको बिदाइ कार्यक्रम राखेको छ ।
एसिया कप भदौ १३ गतेबाट सुरु हुने भएपनि केही अभ्यास म्याच खेल्न नेपाली टीम चाँडै जान लागेको हो । एसिया कपको उद्घाटन खेलमा समुह ए मा रहेको नेपाल र पाकिस्तान भिड्दैछन् ।
क्यानले रोहित पौडेलको कप्तानीमा एसिया कप खेल्ने १७ सदस्यीय टोलीको घोषणा गरिसकेको छ । जसमध्ये स्पिनर सन्दीप लामिछाने भने भोलि पाकिस्तान नजाने भएका छन् । उनी आज टिमसँग पशुपतिनाथ पनि पुगेका थिएनन् । उनी बन्द प्रशिक्षणमा सहभागी भएका छैनन् । सन्दीपको मुद्दामाथिको फैसलामा ढिलाइ भएपछि उनले एसिया कप खेल्ने/नखेल्ने अनिश्चित बनेको छ ।
सन्दीप अस्वस्थ भएकाले उनी बन्द प्रशिक्षणमा सहभागी नभएको क्यान अध्यक्ष चतुरबहादुर चन्दले बताए । भोलि टिमसँग नगए पनि उनले एसिया कप खेल्ने चन्दले विश्वास व्यक्त गरेका छन् ।
