एजेन्सी । २० अगस्ट १९७६ मा जन्मिएका बलिउड अभिनेता रणदीप हुड्डाले आइतबार आफ्नो ४८ औं जन्मदिन मनाएका छन् । रणदीप बलिउडमा आफ्नो क्यारेक्टरलाई उत्कृष्ट रुपमा निभाउने कलाकारका रुपमा परिचित छन् ।
चाहे ‘हाइवे’को किडन्यापर महावीर भाटी होस्, ‘सरबजीत’को भावनात्मक पात्र होस् वा ‘बागी २’ मा कमेडी भूमिका, रणदीपले प्रत्येक पात्रलाई पहिले आफूले अनुभव गरे र त्यसपछि दर्शकसामु प्रस्तुत गरे ।
२०१५ मा फिल्म ‘मै और चार्ल्स’मा रणदीपले बिकिनी किलर भनेर चिनिने चार्ल्स शोभराजको भूमिका निभाएका थिए । चार्ल्सलाई नजिकबाट चिन्नका लागि रणदीपले चलचित्रका निर्देशक पी. रमनलाई काठमाडौँ जेलमा रहेका चार्ल्स शोभराजलाई भेट्न आग्रह गरे । निकै मिहिनेतपछि रणदीपले १० मिनेट चार्ल्स शोभराजलाई भेट्ने मौका पाए ।
ई–टाइम्सलाई दिएको अन्तर्वार्तामा रणदीपले चार्ल्स आफूबाट सात फिट टाढा रहेको बताए । ‘जब म उसको नजिक पुगेँ, उनले मलाई चिनेनन् । त्यसपछि मैले उनलाई आफ्नो र फिल्मको बारेमा भनेँ । उनले मलाई फिल्मको लागि शुभकामना दिए । मैले पात्रको लागि कहाँबाट तयारी गरें भनेर पनि उनलाई चासो लाग्यो । मैले तपाईको उपलब्ध भिडियोहरूबाट यसको लागि तयारी गरेको छु भनेँ । उनले फिल्मको पोस्टरमा अटोग्राफ समेत दिए ।’
