काठमाडौं । गण्डकी प्रदेशको राजनीतिमा नयाँ मोड खडा भएको छ । राष्ट्रिय जनमोर्चाका सांसद कृष्ण थापाले वैकल्पिक सरकारको पक्षमा हस्ताक्षर गर्न नमानेसँगै गण्डकी प्रदेशमा गठबन्धन सरकार बनाउने कांग्रेस-माओवादीसहित चार दलको प्रयास असफल हुन पुगेको छ ।
मुख्यमन्त्री पृथ्वीसुब्बा गुरुङले राजीनामा दिएपछि प्रदेश प्रमुख सीता कुमारी पौडेलले वैकल्पिक सरकार गठनका लागि तीन दिन समय दिनुभएको थियो । जसको समय आज सकिँदैछ । अन्तिम घडीसम्म पनि जनमोर्चाका सांसद कृष्ण थापाको साथ लिन नसकेपछि विपक्षी गठबन्धनले गुरुङलाई विस्थापित नहुने भएका हुन् ।
माओवादी केन्द्रका एक सांसदले कृष्ण थापाका कारण अब एक महिना गुरुङ नै मुख्यमन्त्री हुने निश्चित भएको उल्लेख गरेका छन् ।
प्रदेश सभामा कांग्रेस, माओवादी र जसपाका सांसद थापाको हस्ताक्षर प्रतिक्षामा बसेका थिए । तर, थापाको अस्वीकार गरेपछि उनीहरु फर्किन बाध्य भएका छन् ।
गण्डकीमा राजमोका ३ जना सांसद छन् । यसअघि बिरामी परेर अनुपस्थित हुनुभएका खिमविक्रम शाही पार्टीको निर्णय मान्न तयार भए पनि दलका नेता थापाले आनाकानी गरेपछि कांग्रेसका कृष्णचन्द्र नेपालीलाई मुख्यमन्त्री बनाउने प्रयास असफल भएको हो ।
यता राजमोकी सचेतक पियारी थापाले सोमवार ह्वीप जारी गर्नुभएको थियो । तर नेता थापाले ह्वीपको अर्थ नभएको भन्दै काउन्टर दिनुभएको थियो ।
