काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले कोशीमा सरकार टिकाउन आर्थिक प्रलोभन र मन्त्रीपद बाँड्दै हिडेको आशंका गर्नुभएको छ ।
एक मतका कारण सरकार संकटमा पर्ने अवस्था रहेको कोशी प्रदेशमा सरकार टिकाउन आर्थिक तथा पदको प्रलोभन दिईएको अध्यक्ष लिङदेनले शंका गर्नुभयो ।
उहाँले सामाजिक संञ्जालमा लेख्नुभएको छ-
पूर्वमा विश्वासको मत लिने दिनको टुंगो भएसँगै खरिदेहरु प्रदेश सभा सदस्यहरुको घरदैलोमा गएर मन्त्री र रु.१० करोडको प्रस्ताव गर्दैछन् भन्ने हल्ला काठमाडौ: सम्मै आइपुग्यो त।
कोशी प्रदेशका मुख्यमन्त्री उद्धव थापाले यही भदौ ४ गते सोमबार दिनको १ बजे विश्वासको मत लिने तयारी गर्नुभएको छ । ९३ सदस्यीय प्रदेशसभामा बहुमतका लागि ४७ मत आवश्यक पर्छ ।
थापाको पक्षमा ४७ सांसद र विपक्षमा ४६ सांसद छन् तर सभामुख पद भने खाली रहेको छ । बहुमत पुर्याउन भन्दै थापाले जेष्ठ सदस्य गयानन्द मण्डललाई राज्यमन्त्री बनाउनु भएको छ ।
उपसभामुखले सभा नचलाएको अवस्थामा ज्येष्ठ सदस्यले सभा चलाउनु पर्ने संवैधानिक व्यवस्था रहेको छ । ज्येष्ठ सदस्यले सभा चलाएको अवस्थामा मुख्यमन्त्री उद्धव थापाले विश्वासको मत पाउन कठिन हुने भएपछि मण्डललाई राज्यमन्त्रीमा नियुक्त गरिएको हो ।
